Didier Deschamps, trajneri i Francës, ka folur përpara përballjes në çerekfinale të Europianit ndaj Portugalisë, duke rikujtuar edhe njëherë atë humbje në finalen e vitit 2016, kur portugezët triumfuan me një gol nga Eder në shtesë.
Trajneri francez i është përgjigjur edhe kritikëve për lojën, por mbi të gjitha për golat të cilët kanë munguar në Gjermani. Edhe pse ka arritur në çerekfinale, Franca ende nuk ka realizuar një gol nga aksioni.
“Kundërshtari? Portugalia është e rrezikshme dhe Cristiano Ronaldo është gjithnjë një kërcënim. Ka kapacitetin për të shënuar dhe për të qenë agresiv. Portugalia mbetet një kundërshtar i fortë. Nuk e di nëse janë më të fortë nga 2016 apo jo, di që për ne ajo finale ishte e dhimbshme. Jemi në çerekfinale dhe këtu janë më të mirët, unë e di se çfarë i pëlqen të bëjë Roberto Martinezit dhe do të tentojmë të jemi ne në kontroll të ndeshjes.
Probleme brenda skuadrës? Nuk e di, nga njerëzit që janë këtu, unë shoh një entuziazëm të madh. Ndoshta dikush mund të mos jetë i kënaqur, por unë shoh vetëm persona të lumtur. Sigurisht nga ana tjetër është më e bukur kur fiton 5-4, por kritikët kanë punë e tyre”, tha Deschamps.
Franca do të përballet me Portugalinë mbrëmjen e së premtes në orën 21:00 në çerekfinalen e Euro 2024.
Discussion about this post