Donald Llupi, Liridon Gashi dhe Eduard Gjigoli u arrestuan ditën e sotme nga forcat speciale të FNSH, në Fier. Policia njofton se gjatë kontrollit të ushtruar në Pojan, në lokalin në pronësi të Gjigolit në të cilin ndodheshin edhe Liridon Gashi (i dyshuar se furnizonte me lëndë narkotike pronarin e lokalit) dhe Donald Llupi (i punësuar si kamarier), u gjetën dhe u sekuestruan në cilësinë e provës materiale doza me lëndë narkotike dhe kanabis, 1 armë gjahu me një sasi fishekësh dhe 18.380 euro që dyshohet se janë përfituar nga shitja e lëndës narkotike.
Në vijim të operacionit, shërbimet e Policisë, gjatë kontrollit të ushtruar në banesën e Gashit gjetën dhe sekuestruan në cilësinë e provës materiale 6.5 kg lëndë të dyshuar narkotike cannabis sativa.
Eduard Gjigoli 46 vjeç, banues në Dërmënas, pritet të përballet me akuzën për veprat penale “Prodhimi dhe shitja e narkotikëve”, “Përshtatja e lokalit për përdorim droge” dhe “Mbajtja pa leje e armëve të gjahut”;
Liridon Gashi 30 vjeç, banues në Pojan, pritet të përballet me akuzën për veprën penale “Prodhimi dhe shitja e narkotikëve”;
Donald Llupi 28 vjeç, banues në Pojan, pritet të përballet me akuzën për veprën penale “Moskallëzimi i krimit”.
Në bashkëpunim me Prokurorinë vijon puna për dokumentimin e plotë të kësaj veprimtarie kriminale, identifikimin dhe kapjen e personave të tjerë të përfshirë. Materialet i kaluan Prokurorisë, për veprime të mëtejshme procedurale.
Discussion about this post