Ekipi me të cilin, kryeministri Edi Rama do të drejtojë vendin në mandatin e katërt është gati. Të angazhuar për tre vite, disa prej drejtuesve të Ministrive të rëndësishme të vendit e mbyllën rrugëtimin e tyre me fillimin e mandatit të ri. Konkretisht nga qeveria ikën Igli Hasani, Ervin Hoxha, Ulsi Manja, Arbjan Mazniku dhe Ogerta Manastirliu.
Igli Hasani mabjti për tre vite postin e Ministrit të Jashtëm, vend i cili tani i takon, Elisa Spiropalit. Hasani para postit të ministrit, ka mbajtur pozicionin e Koordinatorit të Aktiviteteve Ekonomike dhe Mjedisore të OSBE-së. Në qeverinë e re Igli Hasani nuk do të jetë pjesë e kabinetit qeveritar.
Ulsi Manja, i cili ka shërbyer në detyrën e Ministrit të Drejtësisë që prej shtatorit 2021, nuk do të qëndrojë më në këtë post. Manja tashmë do të drejtojë Komisionin e Ligjeve.
Ndërkohë, Ervin Hoxha i cili mbajti rreth një vit postin e Ministrit të Brendshëm nuk do të jetë më pjesë e qeverisë. Hoxha mori detyrën në korrik të vitit 2024, ndërsa vendin e tij tashmë e ka zënë për herë të parë një grua, Albana Koçiu. Me emërimet e reja Hoxha mbeti pa një post.
Një emër tjetër, i cili nuk do të jetë pjesë për mandatin e katërt në kabinetin qeveritar është Arbjan Mazniku. Ky i fundit që prej shtatorit 2023 mbante postin e Ministrit të Shtetit për Pushtetin Vendor, por do të zëvendësohet nga Ervin Demo. Edhe Mazniku e mbylli me mandatin e tretë të Partisë Socialiste, pasi nuk u emërua në asnjë post.
Ogerta Manastirliu, një nga ministret më jetëgjata të tre mandateve, nuk do të jetë pjesë e kabinetit. Manastirliu, e cila mbante postin e Ministres së Arsimit dhe Sportit u lirua nga kjo detyrë dhe u propozua kandidate për postin e kryebashkiakut të Bashkisë Tiranë.
Ndërkohë një fat tjetër patën disa prej tyre, të cilët arritën të mbanin edhe për një mandat tjetër 3-vjeçar ‘frenat’ e ministrive. Një prej tyre, ndër më të vjetrat në postin e ministres ësht Belinda Balluku. Me 6 vite mbi supe tashmë, ajo do të vazhdojë të jetë dhe në krye të Infrastrukturës dhe Energjitikës, një prej posteve ministrore më të rëndësishme në vend. Petrit Malaj do të mbajë edhe për këtë mandat postin e Ministrit të Financave. Po ashtu edhe Mirela Kumbaro do të vazhdojë të jetë pjesë e kabinetit qeveritar si ministre e Arsimit. Edhe Blendi Gonxhja do të vazhdojë me një post në qeverinë e re, i cili do të jetë në krye të Ministrisë së Kulturës dhe Turizmit.
Discussion about this post