Deputeti demokrat Edmond Spaho ka deklaruar se do të tërhiqet nga Komisioni Hetimor për Inceneratorët, pasi sipas tij, pavarësisht dëshirës së opozitës për të publikuar fakte që tregojnë abuzimet, është qeveria ajo që ka në dorë vendimet.
Spaho bëri deklaratën e papritur kur tha se nuk do të jetë pjesë e asnjë komisioni hetimor në të ardhmen, pa u ndryshuar më parë ligji për funksionimin e tyre.
“Ngjarja e djeshme ishte një nga më qesharaket që kam përjetuar ndonjëherë, këtu ka deputetë që nuk duhet të jenë pjesë e Komisionit, ka deputetë që kanë lidhje fisnore dhe familjare me persona që po hetohen nga ky institucion. Shoh që stafi i komisionit është nën presion politik, rasti i interpretimit të djeshëm të ligjit është skandaloz. Me përjashtim të një portali që shkroi për çështjen e zotit Olldashi, asnjë media tjetër nuk ka pasur kurajon të mbështesë gazetarët, që bëjnë investigime të tilla. Unë mendoj se ky Komision nuk do të ketë rezultat, pavarësisht përpjekjeve tona për të nxjerrë faktet në dritë, për të informuar publikun për vjedhjet skandaloze që janë bërë në 3 kontrata. Të marrësh në mbrojtje Klodian Zoton, dhe të mos lejosh dëshminë e gazetarit, është skandaloze, nuk e nderojnë këtë komision. Unë nuk kam për të qenë pjesë e këtij Komisioni, dhe nuk do të jem pjesë e asnjë komisioni, që ndikohet politikisht. Nuk do të jem pjesë e komisioneve nëse nuk ndryshon ligji”, tha Spaho.
Discussion about this post