Rriten infektimet nga përhpaja e variantit Delta, por kufizimet për qytetarët nuk ndryshojnë. Komiteti i Ekspertëve la në fuqi masat ekzistuese si dhe publikoi të dhënat në lidhje me situatën aktuale.
Në prag të fillimit të vitit të ri shkollor, ekspertët u bënë thirrje institucioneve arsimore që të respektojnë protokollet anti-Covid. Ndërsa mësuesit dhe studentët që refuzojnë kryerjen e vaksinës, çdo javë duhet të bëjnë tamponin për të provuar negativitetin ndaj Covid-19.
Të pyetur nga mediat në lidhje me blerjen e certifikatës anti-Covid në pikat e vaksinimit, ekspertët nuk e mohuan fenomenin. Ata e cilësuan kriminale, ndërsa u shprehën të hapur për të bashkëpunuar me organet hetimore.
Zyrtarisht, 42% e popullsisë në vend ka marrë dozën e parë anti-Covid, ndërsa 32% janë vaksinuar me të dyja dozat. Mjekët nuk përjashtuan rastet e humbjes së jetës edhe tek të vaksinuarit, por kjo, sipas mjekëve të Spitalit Infektiv, ka ndodhur tek pacientët me sëmundje të rënda shoqëruese.
