Gjovalin Shkambi, xhaxhai i Elvis Shkambit, autorit të vrasjes së gjyqtarit Astrit Kalaja, ka bërë një deklaratë të rëndë e kërcënuese ndaj sistemit të drejtësisë. Ai është shprehur se cilido gjyqtar që do të dënojë nipin e tij, do të përballet me të njëjtin fat si gjyqtari Kalaja.
Sipas tij, familja e tij është tradhtuar nga shteti dhe ka 13 vite që përpiqet të fitojë të drejtën mbi një pronë, të cilën pretendon se e ka blerë me dokumente të rregullta.
Ai thekson se kanë njoftuar institucionet më të larta të shtetit përmes shkresave, përfshirë edhe kryeministrin, por nuk kanë marrë përgjigje. Thotë se janë futur në borxhe për të ndjekur proceset gjyqësore dhe se ndihen të braktisur.
“Kemi 13 vjet që i shkruajmë kryeministrit dhe gjithë qeverisë: na jepni pronën, se e kemi ble. Ja kemi ble shtetit, me letra e me ligj. Familjes së ndjerit gjyqtar i ulemi në gjunjë, i kërkoj hallallin me kishë e me xhami. Por nëse e dënojnë atë djalë, ai do gjykohet siç u gjykua Astriti.
E kemi ble pronën me ligj, me rregulla. Kushdo që dënon atë djalë, të njëjtën gjë ka me pësu – qoftë edhe Donald Trump e Papa – nuk ka lojë me ne. Ashtu do përfundojnë. Ne i kemi fitu të gjitha gjyqet, e kemi certifikatën. Ka 13 vjet që i shkruaj kryeministrit: ta hetojë këtë punë! Nuk ka lojë më me ne, as me të ndjerin, as me familjen e tij.”– tha ai.
Policia e Shkodrës ka shoqëruar Gjovalin Shkambi, xhaxhain e Elvis Shkambit i cili një ditë më parë vrau gjyqtarin Astrit Kalaja.
Në një deklaratë më herët gjatë ditës, Shkambi kërcënoi se cilido gjyqtar që do të guxonte të dënonte nipin e tij di të kishte të njëjtin fund si Kalaja.
Discussion about this post