Epidemiologu Erion Dasho deklaron se vaksinimi me detyrim është vendimi më i gabuar që ka marrë qeveria si hap për të frenuar koronavirusin. Përmes një postimi në rrjetin social Facebook, ai shkruan se ata qytetarë që kanë frikë ta bëjnë vaksinën, gjejnë mënyrë të tjera për të siguruar certifikatë vaksinimi edhe kur nuk janë vaksinuar.
Ai shprehet se, shumë qytetarë paguajnë një shumë të madhe parash për t’u pajisur me certifikatë vaksinimi fals dhe kjo përveç se nxit korrupsionin, rrezikon përhapjen e virusit më shumë.
“Një nga pasojat e rënda të vendimit për vaksinim të detyrueshëm është nxitja e manipulimit dhe mashtrimit. Me dhjetëra dhe qindra qytetarë mund të drejtohen pranë mjekëve dhe infermierëve të pandërgjegjshëm duke ofruar ryshfete për të marrë një vërtetim si “person i vaksinuar”, por pa e kryer realisht vaksinën.
Vetëm duke i lënë studentët dhe qytetarët të vaksinohen bazuar në zgjedhjen e tyre të lirë, mbështetet realisht procesi i vaksinimit dhe mbrohet shëndeti dhe jeta e qytetarëve.
Vaksinim Po! Detyrim Jo”, shkruan mjeku.
Sipas Dashos, qeveria duhet t’i sensibilizojë qytetarët dhe jo t’i detyrojë ata të vaksinohen sepse kështu po shkel të drejtat e tyre.
E.H/ gijotina.com/
