Ndonëse në disa shkolla vazhdon mësimi me dy turne, nuk punojnë kaldajat në dimër, ka mungese laboratorësh dhe kushtesh të tjera, Ermal Dredha është i zënë me pazarin e tenderit për një palestër. Dhe ndërtimi i saj do të marrë 1.5 milionë euro.
Bëhet fjalë për shkollën 9-vjecare Lef Sallatat, për të cilën Dredha ka zhvilluar tenderin me objekt ‘Rikonstruksion dhe shtesë anësore me 3(tre) kate në shkollën 9-vjeçare Lef Sallata’. Sipas përshkrimit të projektit, një pjesë e parave do të merren direkt nga buxheti i shtetit dhe pjesa tjetër nga buxheti i bashkisë.
Gara ka qëndruar e hapur për 18 ditë dhe pjesëmarrja ka qenë e lartë. Kështu, për këtë tender kanë shfaqur interes 9 kompani.
Gjithsesi pjesëmarrja e firmave ka shërbyer vetëm për fasadë, pasi Dredha duket se e kishte përcaktuar fituesin pa e njoftuar tenderin. Menjëherë në fazën e parë komisioni i vlerësimit ka skualifikuar 6 ofertat më të lira sepse kishin mungesë të dokumentacionit si, katalog të prodhimeve, autorizim për prodhim. Me të njëjtën argument ka skualifikuar edhe 2 firma të tjera. Ligji ka krijuar hapësirë që për të tilla raste, kur firmat kanë mungesë dokumentacionesh duhen vënë në dijeni, me qëllim që gara të vazhdojë dhe të ketë konkurrencë.
Në fakt, siç kemi raportuar edhe herë të tjera, Dredha e eliminon konkurrencën dhe i hap rrugën kompanisë së favorizuar.
Në fund mbeti e vetme kompania ‘VALONA KONSTRUKSION (ish “MARINA BAY LUXURY RESORT AND SPA”)’ me ofertën 1.3 milionë euro. Në këtë propozim nuk përfshihet TVSH, që pritet ta rrisë akoma më shumë vlerën e kontratës.
Pra, Dredha i fali Besnik Lulajt kontratën 1.5 milionë euro. Ky tender është shënuar nga Open Data Albania me “Flamurin e Kuq”, që është shenja e riskut të korrupsionit.
Për shkak të ndikimit të njerëzve nga bota e krimit, kryetari nuk ka ngurruar t’i përziejë paratë e taksapaguesve me ato të trafikimit të lëndëve narkotike. Kujtojmë se Besnik Lulaj është ortak i Luftar Hysajt, i cili sipas mediave ndërkombëtare është i implikuar në një celulë të kartelit meksikan “Sinaloa”.
Lidhjet e këtyre “biznesmenëve” shkojnë deri lart.
Edi Rama e mohoi në vitin 2022 takimin që ka bërë në kryeministri, me pronarin e “Marina Bay” Besnik Lulaj dhe ortakun e tij në lojëra bixhozi e trafiqe, Luftar Hysa, pjesë e grupit mafioz meksikan të drogë, që po pastron para në turizmin bregdetar jugor të Shqipërisë si “Investitor Strategjik”.
Ai tha se anëtarin e kartelit Besnik Lulaj, trafikant e biznesmen me qendër në Vlorë, nuk e njeh, por ka dëgjuar që është qytetar e biznesmen model.
3 vite para takimit në zyrë me anëtarët e kartelit “Sinaloa”, u dha leje për ndërtimin e resortit “Marina Bay” në Vlorë mbi tokë shtetërore të tjetërsuar, ndërsa 2 muaj pas takimit në kryeministri me 3 tetor 2020, u dha lejen për kazino në këtë resort.
Edhe pronari i “Marina Bay”-Vlorë, Besnik Lulaj e një familjar i tij me emrin Besmir Lulaj, që u prezantua në një emision televiziv si jurist i resortit, tha se nuk kanë asnjë lidhje dhe ortakëri në kazino e biznese, me anëtarin e kartelit El Chapo, Luftar Hysa.
Ndërkohë më 26 gusht 2022, ata kanë marrë leje për kazino tjetër “Balkan Interaktive Group” te hoteli “Radisson Collection Morina” në Farkë-Tiranë, në pronësi të bashkë-trafikantit Lul Morina, të cilin e inauguroi Edi Rama.
Dhe tani që e dimë se kush po i merr paratë e tenderit, e kuptojmë se kryebashkiaku ka marrë urdhër ta manipulojë këtë tender, por përgjegjësia mbetet e firmosur në dokumente.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post