Kryetari i ri Bashkisë Vlorë, Ermal Dredha vazhdon listën e aferave që e ka lënë të gatshme paraardhësi i tij Dritan Leli. Këtë herë Dredha ka dredhuar përmes Ujësjellës Kanalizime Vlorë, ndërmarrje që varet prej bashkisë. Bëhet fjalë për tenderin me numër reference REF-70638-05-25-2023 për furnizim me karburant.
Për këtë tender Dredha ka parashikuar të shpenzojë 368 milionë lekë, ku thuhet se do të sigurohet naftë për vitin 2023. Në fakt, mbeten vetëm 5 muaj nga ky vit, sepse jemi në korrik, pavarësisht se lekët hidhen sa për 12 muaj.
Por, pavarësisht manovrave të tilla për të përfituar në saj të postit që ka, Dredha ka lënë gjurmët e shkeljeve në dokumentet e zhvillimit të këtij tenderi.
Kontrata është firmosur më datë 5 korrik dhe është vlerësuar me “Flamurin e Kuq” nga monitoruesi Open Data Albania për shkak të mungesës së konkurrencës. Ngritja e “Flamurit të kuq” tregon riskun e lartë për korrupsion me fondin e prokuruar.
Sipas dokumentit, FJORTES shpk, në pronësi të Silvana dhe Dulo Sadrija, është e vetmja kompani që ka dorëzuar ofertë për këtë tender.
Me sa duket Dredha vetëm këtë kompani ka vendosur lidhje, sepse Sadrija është një biznesmen i njohur në Vlorë, për bashkëpunimet që ka me bashkinë në ndërtime resortesh dhe pazare karburantesh.Kështu, Dredha ia ka dhuruar tenderin mikut të Dritan Lelit dhe e ka firmosur menjëherë kontratën, duke shkelur rregullat e prokurimit.
Në këto 345 milionë lekë që ka kërkuar Fjortes SHPK është e kuptueshme që vetëm një pjesë do të shkojnë për projektin, pjesa tjetër kthehet në fitim të pamerituar që ushqen korrupsionin.
Sikur e theksuam më lartë, FJORTES shpk ka marrë shumë përfitime nga bashkia Vlorë në kohën e Dritan Lelit. Shumë pranë detit zotëron një hotel “FJORTES PALACE HOTEL VLORE”, një bar dhe gjithashtu disa pika karburanti në rrugët kryesore. Ndërsa vëmë re se të gjithë tenderët që ka përfituar kjo kompani i ka dhuratë nga Bashkia Vlorë, edhe në kohën kur kjo drejtohej nga Dritan Leli. Pra, kryetari i ri po vazhdon zakonet e vjetra me listën e biznesmenëve të privilegjuar.
Lexo edhe:Ermal Dredha në gjurmët e Dritan Lelit, blen 167 mln lekë karburant me dy tendera pa garë
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post