Pasditen e kësaj të enjteje, ka filluar raundi i dytë i fazës në grupe të Kampionatit Europian për grupmoshën deri në 19 vjeç. Këtë pasdite u luajt njëri nga dy takimet në program, ditën e sotme.
Ndeshja e orës 18:00, mes Italisë dhe Portugalisë u mbyll me suksesin e luzitanëve me shifrat 5-1. Kjo ndeshje ishte e vlefshme për grupin A, grup ku bëjnë pjesë dhe Malta me Poloninë.
Takimi nisi shumë mirë për Italinë, me “të kaltrit’ që kaluan në epërsi, vetëm pas 6 minutash lojë, me goditjen e saktë me kokë, të Lipanit, i asistuar në mënyrë perfektë, nga italo-shqiptari Luis Hasa.
Portugezët u hodhën në sulm, në kërkim të barazimit, me sulmet e tyre, që u bënë më të rrezikshme, me kalimin e minutave.
Baraspesha, u vendos në minutën e 35’, me Ribeiron që përfitoi nga vendosja e gabuar e mbrojtjes, duke dërguar topin, në fundin e rrjetës.
Në fund të pjesës së parë, ndodhi dhe episodi që, de facto, vendosi fatet e ndeshjes. Arbitri gjerman i sfidës, Jablonski, largoi, duke ndëshkuar me kartonin e dytë të verdhë, autorin e golit për italianët, Lipanin, për një faull të rëndë ndaj kundërshtarit.
Duhet theksuar ama, se para faullit të Lipanit, vetë mesfushori pësoi një ndërhyrje të gabuar gjatë zhvillimit të aksionit në fjalë, me arbitrin që, nga dy hapa larg, vendosi që “të mbyllte sytë”.
Në pjesën e dytë, Italia, e ndjeu jashtë mase, inferioritetin numerik, me portugezët që e shtuan dozën e sulmeve të tyre, duke gjetur golin, falë goditjes fantastike të Gustavo Sa.
Edhe pse kishte më shumë se 30 minuta në dispozicion, për të barazuar shifrat, Italia dukej e pafuqishme për të vënë nën presion, portën e kuqegjelbërve, të cilët nga ana e tyre, nuk u kënaqën me avantazhin minimal, duke tentuar disa herë, që të gjenin golin e tretë.
Në të 68’ minutë, Bras, goditi saktë me kokë, duke realizuar kështu golin që vuri, që në atë moment, në kasafortë, tre pikët për kombëtaren U19 të Portugalisë.
Italianët “u zhdukën nga qarkullimi” plotësisht, me Portugalinë, që e ktheu në ndeshje stërvitore, duke realizuar edhe të katërtin, në minutën e 88’, falë goditjes së saktë të Hugo Felix
Në minutën e 91’, Italia pësoi dhe të pestin, nga Goncalves, duke konfirmuar kështu, gjendjen katastrofike të skuadrës, në duelin e sotëm.
Me këtë triumf, luzitanët hedhin një hap të sigurt, drejt fazës gjysmëfinale, me takimin ndaj Maltës, që do të shërbejë, për të aktivizuar lojtarët që kanë patur më pak minuta.
Nga ana e saj, Italia do të ketë detyrimin që të bëjë ndeshjen perfekte, ndaj Polonisë, për të siguruar vendin e dytë, i mjaftueshëm për të avancuar më tej./m.b /gijotina.com
Discussion about this post