Polonia ka triumfuar në takimin e mbrëmjes së sotme ndaj Maltës, të vlefshëm për raundin e dytë të fazës në grupe, të UEFA EURO U19 që po zhvillohet në ishull.
Bardhekuqtë iu gëzuan tre pikëve të para në këtë turne, duke mbajtur gjallë shpresat për kualifikim drejt fazës tjetër të këtij kompeticioni.
Takimi mes dy ekipeve, nisi i ekuilibruar, me skuadrat që në pjesën e parë studiuan njëra-tjetrën, duke u kujdesur më shumë, për fazën mbrojtëse.
Gjatë 45 minutave të para, nuk pati shumë raste për gol, megjithatë, loja e fortë nuk mungoi, me duelet për top që ishin deri diku, të rënda. Në minutën e 22’, Polonia mbeti me 10 lojtarë. Mesfushori Matyjewicz mori kartonin e dytë të verdhë, pasi ndërhyri më ashpër seç duhej, ndaj kundërshtarit, duke bërë që, arbitri t’a largonte nga fusha e lojës, pa shumë hezitim.
Deri në fund të pjesës së parë, portat mbetën të paprekura.
Në fraksionin e dytë të lojës, polakët ndryshuan strategji, duke patur parasysh edhe faktin se ishin në fushë, me një lojtar mangut.
Megjithatë, atëherë kur dukej se Malta do kalonte në avantazh, miqtë befasuan, duke zhbllokuar shifrat në minutën e 59’, me anë të Strzalek, i cili goditi saktë, duke mposhtur portierin vendas, Sako.
Nervozizmi ‘pushtoi’ kombëtaren e Maltës, e cila kërkoi me të gjitha mënyrat për të barazuar rezultatin. Në minutën e 62’, u vendos baraspesha… e lojtarëve në fushë. Sciculina, ndërhyri shumë rëndë ndaj kundërshtarit të tij, duke marrë kartonin e kuq dhe duke lënë skuadrën e tij me 10 futbollistë.
Kjo gjë e vështirësoi punën e ishullorëve, të cilët nisën që të hasnin akoma më shumë probleme, përsa i përket iniciativave të tyre sulmuese.
Atëherë kur dukej, se nuk do të kishte më gola, Pienko, realizoi për Poloninë, 8 minuta para fundit të kohës së rregullt, duke i çuar shifrat në 2-0.
Në minutat shtesë, përveç disa rasteve okazionale për gol, nga të dy ekipet, nuk pati më histori, me Poloninë që siguroi tre pikët e para në fazën e grupeve.
Tashmë, takimi ndaj Italisë, do të jetë një finale për vendin e dytë, që të kualifikon për në fazën gjysmëfinale.
Malta, nga ana e saj, e mbyll këtu aventurën në UEFA EURO U19 2023, me takimin e fundit, ndaj Portugalisë, që do të shërbejë, thjesht për statistikë./m.b /gijotina.com
Discussion about this post