Rafael Leao bëri stërvitjen e rregullt të përfundimit me pjesën tjetër të grupit në prag të Inter-Milanit dhe për këtë arsye është plotësisht i disponueshëm për ndeshjen e dytë të Euroderby.
Me përjashtim të surprizave, ai do të startojë në të majtë dhe do të drejtojë tentativën e “remontadës” të skuadrës së Piolit.
Kruniç, Florenzi dhe Messias u stërvitën me pjesën tjetër të lojtarëve, ndonëse këta të fundit u shkëputën në fund të seancës për të kryer disa ushtrime të personalizuara. Saelemaekers mbetet favoriti ndaj brazilianit për të startuar në të djathtë.
Dita e Leaos në Milanello kishte nisur herët, rreth orës 11:15, shumë përpara orarit të stërvitjes, i caktuar për në orën 17:00, prania e tij ndoshta lidhej me ndonjë terapi/masazh që do të bëhej për të qetësuar pasojat e dëmtimit.
Gjashtë ditë më parë, pa Leaon, gjërat shkuan shumë keq, me Milanin e surklasuar nga Interi në lojë dhe në rezultat. Duhet një paraqitje më shumë se perfekte, siç e dinë ata 1000 e më shumë tifozë që mbërritën të dielën për të inkurajuar ekipin.
Nuk lejohen shpërqendrime dhe kështu Pioli dhe skuadra mbyllen në Milanello për t’u përgatitur për ndeshjen më të rëndësishme të vitit: grumbullimi nuk është më fakultativ si në ndeshjen e parë, por i detyrueshëm.
Takimi përballë Interit, luhet të martën, më fillim në orën 21:00.
Discussion about this post