Falja për Lukakun, Pacifici: Nuk ndryshon gjë, kush provokon…

Gjysmëfinalja e Coppa Italia mes Juventus dhe Inter u shoqërua nga polemika të shumta pas përfundimit të takimit.

Koret raciste ndaj sulmuesit belg të Interit Romelu Lukaku provokuan festimin e këtij të fundit ndaj tyre. Kjo gjë bëri që arbitri ta ndëshkonte me karton të verdhë por fakti që kishte një të verdhë tjetër, e largoi nga fusha.

Megjithatë, presidenti i ri i Shoqatës së Arbitrave në Itali, Carlo Pacifici, është i bindur se falja që Gravina i bëri Lukakut nuk do të ndryshojë asgjë.

Ai u shpreh se sërish do të ndëshkohen futbollistët nëse festojnë në mënyrë provokative.

“Rasti i Lukakut nuk do të kthehet në precedent dhe nuk do të ndryshojë absolutisht asgjë. Falja erdhi nga presidenti sepse ai është kompetent dhe drejtues e ka analizuar të gjitha kushtet, megjithatë nga ana jonë nuk do të ndryshojë asgjë në lidhje me rregullat. Kush feston duke heshtur tifozët pas sulmeve që i bëhen, do të ndëshkohet sërish”, u shpreh Pacifici.