Ish-kandidat për kryetar të PD, Fatbardh Kadilli, ka folur sot për situatën në PD si dhe për hapat që sipas tij duhet të merren për të dalë nga kriza. Kadilli tha gjatë një interviste televizive se, vendi ka nevojë për një opozitë të re, përtej Bashës e Berishës. Sipas tij, një frymë e re duhet të vijë në PD për të ringritur partinë në vendin që i takon.
“Kemi detyrimin t’u ofrojmë shqiptarëve opozitë dhe nuk kemi asnjë shans tjetër veçse të krijojmë një opozitë krejtësisht të re, një opozitë të shkëputur nga e shkuara. As modeli i Bashës, as ai i Berishës, edhe pa ndodhur këto që ndodhën, nuk duhet të ishin më ofertë politike për demokratët, të cilët nuk duhet të jenë të dënuar të shohin mes njërit apo tjetrit”, tha ai
Më tej, ai u shpreh se në PD ka njerëz që mund ta çojnë partinë drejt fitores, por sipas tij, këtë nuk e bën dot as Basha dhe as Berisha. “PD është një parti shumë e madhe, e cila ka lindur nga idealet. Ata njerëz që u bashkuan PD-së që në ditën e parë, kanë qenë njerëz me guxim dhe këta janë shtuar. PD mund të ketë me mijëra persona për të krijuar ekipet e reja politike. Problemi është se kryetari kthehet gati në një mbret. Basha dhe Berisha duhen harruar, me asnjërin nuk fitojmë dot”, tha Kadilli. Kadilli, që prej fillimit është shprehur se nuk mbanë as anën e Berishës dhe as anën e Bashës, por kërkon rikonstruktim të PD.
Discussion about this post