Fermerët e të Beratit e Fierit vazhdojnë protestën e tyre në Urë të Kuçit, pikërisht në pikën ku ndahet kufiri mes dy qarqeve. Me pankarta në duar dhe të revoltuar ata kanë ngritur zërin ndaj rritjes së çmimeve për plehërat kimikë dhe inputeve bujqësore, ndërkohë që subvencionet sa vjen edhe ulen nga qeveria. Të gjithë njëzëri, kërkojnë ndërhyrjen e qeverisë për të marrë më shumë subvencione, pasi skema e re lë shumë prej tyre pa përfituar asgjë prej shtetit, ndërsa kërkojnë edhe uljen e çmimit të naftës.
“Na tha subvencion 100 lekë për litër dhe gënjeu ministrja. Nafta ka shkuar 2 mijë lekë. Të vijë ministrja ta mbajë stallën një ditë të vetme. Jemi të tërë me borxhe. Të vijë ministrja të na sqarojë. Na gënjeu ministrja, plehrat janë të shtrenjta, nafta 2 mijë lekë. Po ikin të tërë njerëzit. Mosha ime ka ikur. Ne kërkojmë të na ulin plehrat dhe naftën, të heqë taksën. E kemi votuar PS gjithmonë na gënjeu këtë herë”, thotë një tjetër. Ndër të tjera, ata shprehen se pas zgjedhjeve asgjë nuk është bërë për bujqësinë, saqë ky sektor ka pësuar goditjen më të madhe.
Discussion about this post