Kryetari Bashkisë Kavajë, Fisnik Qosja, ia beson ushqimin e Azilit të të moshuarve një kompanie me pronar të dënuar për korrupsion. Tenderi që ka marrë “Flamur të kuq”, është organizuar nga drejtori Fisnik Krasniqi, që është në varësi të bashkisë.
Kështu shënohen nga Open data Albania procedurat e prokurimit korruptive dhe në mosrespektim të ligjeve anti-korrupsion. Prokurimi është zhvilluar me një konkurrent të vetëm. Shpesh këto tendera janë më shumë se mungesë konkurrence në treg, shfaqin opsione të formulimit të kritereve dhe afateve për dorëzim dokumentesh në favor të një kompanie të paramenduar klienteliste.
Më konkretisht, Shtëpia e të Moshuarve Kavajë ka kryer tenderin me objekt “Furnizim me ushqime” me fond limit 8 195 600,00 lekë ose 9,834,720,00 lekë.
Bëhet fjalë për furnizimin për 1 vit të kuzhinës me produktet e domosdoshme për gatim. Tenderi u njoftua në Agjencinë e Prokurimeve më 29 janar 2025, ndërkohë që dita e fundit e dorëzimit të dokumenteve ishte më 10 shkurt 2025. Dhe brenda kësaj dite është mbyllur me nxitim ky prokurim, i cili është kryer me një pjesëmarrës.
I vetmi operator ekonomik i paraqitur në tender ishte “4 S”, me pronar “de facto” Shemsi Sinanin, i dënuar për korrupsion me tenderat.
Kjo është një nga firmat kryesore që marrin pjesën e luanit të furnizimit me ushqim të konvikteve, azileve, qendrave rezidenciale, burgjeve, spitaleve dhe institucioneve. Prokurimet në këtë sektor janë kthyer në fiktive sepse janë të njëjtat firma që i kanë monopolizuar furnizimet. Pa pyetur fare për mungesën e konkurrencës, 4 ditë më vonë është lidhur kontrata me “4 S”.
Kompania që korrupton drejtorët
Shpjegojmë këtu se firma ‘4S’ drejtohet nga Xhino Sinani, por themeluesi dhe drejtuesi real i saj është babai i tij Shemsi Sinani, i cili me firmën “Sinani Trading” shpk është akuzuar më parë për vjedhje me tenderat. Më parë kompania quhej “M. B. KURTI” SHPK, por pas shumë abuzimeve dhe numrit të lartë të tenderave ndryshoi emri në “Sinani Trading” shpk, për t’i shpëtuar drejtësisë. Gjithsesi në vitin 2018 aferat e kësaj kompanie u zbuluan dhe pronari i saj Shemsi Sinani doli para drejtësisë.
Kujtojmë se, bëhet fjalë për skandalin ku u përfshi ish-zëvendës drejtori i burgjeve, Iljaz Labi.
Drejtori bashkë me Shemsi Sinanin kishin abuzuar dhe zhvilluar në shkelje të ligjit tenderin për blerjen e ushqimeve në burgje.
Sinani, kreu i kompanisë “Sinani Trading” shpk kishte fituar tenderin pa garë dhe me probleme në dokumentacione, asaj kohe Gjykata e Lartë vendosi katër vite burg për të. Nga hetimi ka rezultuar se administratorët takoheshin me njëri-tjetrin dhe binin dakord për pjesëmarrjen në tender, duke shkëmbyer informacionin dhe duke përpiluar dokumentet e pjesëmarrjes në prokurime, në mënyrë të tillë që të fitonte njëri prej tyre, sipas bisedave që ata bënin. Administratorët e këtyre shoqërive me në krye Shemsi Sinanin paraprakisht përcaktonin edhe se cili prej tyre do të dilte fitues në njërin prokurim apo në secilin lot prokurimi. Por, pavarësisht këtij skandali, kompania e Shemsi Sinanin vazhdon të gllabërojë tendera me një emër të ri.
Klient i besuar në bashkinë Kavajë
Vetëm gjatë vitit 2024 kompania “4 S” mori 74 tendera nga njësitë vendore, ku pjesa dërrmuese ishin me “Flamur të kuq”.
Dhe qeverisja vendore Kavajë bën pjesë në hartën e tenderave që ka përfituar “4S”. Kështu në prill 2024 është lidhur kontrata e Azilit me vlerë 1 800 000,00 lekë me kompaninë e Sinanit për furnizimin me mish dhe nënprodukte të tij. Kontrata akoma nuk ka mbaruar sepse është me afat 12 muaj, por brenda kohëzgjatjes së saj, i jepet një tjetër tender të njëjtës firmë. Në të njëjtën ditë kjo kompani ka marrë edhe tenderin për bulmet dhe nënprodukte të tij të institucionit të Azilit me vlerë 1 800 000,00 lekë dhe me afat 1 vit. Por kompania nuk merret vetëm me ushqimet. Bashkia Kavajë i ka dhënë vitin e kaluar kompanisë së Sinanit edhe kontratën për dru zjarri dhe pellet.
Ligji është shumë i qartë dhe e ndalon pjesëmarrjen në tendera të kompanive me aksioner apo drejtues të dënuar më parë. Dhe në dokumentet standarde të tenderit vendoset kjo pikë.
Por komisionet nuk i referohen ose e zbatojnë krejt formalisht duke u mjaftuar me dëshminë e penalitetit të pronarit zyrtar, pa e verifikuar historikun e mëparshëm.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post