Muhamet Rrumbullaku, Drejtori i Policisë së Shtetit, dha sot detaje nga megaoperacioni ‘Flakë në det’.
Sipas drejtori të Policisë së Shtetit, Muhamet Rrumbullakut, gjithçka nisi pas zbulimit të një rrjeti të trafikut të drogës në Patok, ku u pikasën dy mjete lundruese që shkëmbenin ‘mallin’.
Sipas policisë, shtetasit që ndodheshin në velerië, i kanë vënë zjarrin mjetit lundrues, ndërsa personat që ndodheshin në bord, janë arrestuar.
“Operacioni i koduar ‘Flakë në det’, i finalizuar në bazë të inteligjencës policore. Filloi pas njoftimit për lëvizjen e një mjeti lundrues nga Laguna Patoku në jug-perëndim.
Ka kontaktuar në det një tjetër mjet, dhe dy personat në dy mjete kanë shkëmbyer lëndë narkotike. Shtetasit në Velierë kur kanë konstatuar policinë, i kanë vënë zjarrin mjetit dhe kanë tentuar të largohen me një barkë por janë kapur në flagrancë. Po ashtu janë arrestuar 24 shqiptar dhe 2 ukrainas. 23 kg drogë e sekuestruar”, tha ai.
Në vijim, Rrumbullaku tha se GJKKO ka caktuar masën e sigurisë me burg për veprën kriminale të trafikimit të drogës në kuadër të organizatës kriminale, për 4 shtetas. Rrumbullaku konfirmoi arrestimin e shefit të Komisariatit Kurbin, Dritan Meta, ndërkohë që tha se 3 persona të tjerë janë shpallur në kërkim, pasi ndodhen jashtë territorit të Shqipërisë.
“Në vijim të hetimeve intensive dhe të pandërprera në kuadër të operacionit “Flakë në det”, të kryera nga strukturat hetimore të Policisë së Shtetit, në bashkëpunim me SPAK-un, Gjykata e Posaçme kundër Korrupsionit dhe Krimit të Organizuar ka caktuar masat e sigurisë “Arrest në burg”, për veprat penale “Trafikimi i narkotikëve”, kryer në bashkëpunim në kuadër të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata krimianle dhe grupi i strukturuar kriminal”, për shtetasit:
Gëzim Çelaj, banues në Fushë Kuqe;
Arben Dalipaj, banues në Vlorë;
Roland Guza, banues në Durrës;
Dritan Metaj, me detyrë shef i Komisariatit të Policisë Laç.
Ditën e sotme, Policia e Shtetit ka ekzekutuar masën e sigurisë “Arrest në burg”, për shefin e Komisariatit të Policisë Laç, Dritan Metaj, ndërsa 3 shtetasit e tjerë janë shpallur në kërkim. Policia e Shtetit, në bashkëpunim me homologët dhe me agjencitë ligjzbatuese ndërkombëtare, po punon intensivisht për lokalizimin dhe kapjen e tyre, pasi nga informacionet dhe verifikimet e deritanishme rezulton se këta 3 shtetas janë jashtë territorit të Republikës së Shqipërisë.
Në zbatim të vendimit të Gjykatës së Posaçme Kundër Korrupsionit dhe Krimit të Organizuar, po vazhdon operacioni në terren për sekuestrimin e pasurive të luajtshme dhe të paluajtshme të shtetasve Gëzim Çelaj, Nderim Çelaj, Arlind Ismailukaj dhe personat e tjerë të lidhur me ta, duke përfshirë shoqërinë tregëtare, automjete, mjete lundruese dhe asete të tjera”, tha kryepolici.
Rrumbullaku tha se operacioni në fjalë nuk ka pasur asnjë dekonspirim, ndërsa u shpreh se ka pasur dijeni prej kohësh lidhur me hetimin që u finalizua sot.
Operacioni i sotëm është në kuadrin e operacionit të zhvilluar pak kohë më parë ku u arrestuan 6 shtetas, 4 shqiptarë dhe dy ukrainas, që po shkëmbenin drogën në det.
Rrumbullaku tha se tashmë Policia e Shtetit po veproin duke sekuestruar pronat e të arrestuarve nga ky operacion.
Në kuadër të megaoperacionit policor të koduar “Flakë në det” u arrestuan:
Arlind Ismailukaj, 47 vjeç, banues në Tiranë;
Armando Mema, 37 vjeç, banues në Tiranë;
Nerim Çela, 40 vjeç, banues në Fushë Kuqe, Laç;
Besnik Brokeri, 51 vjeç, banues në Vlorë;
Kyrylo Ponomarenko, 39 vjeç, banues në Ukrainë;
Kostiantyn Biellon, 44 vjeç, banues në Ukrainë.
Discussion about this post