Ekzekutimi i biznesmenit dhe politikanit Ardian Nikulaj në Shëngjin mesditën e 19 prillit ka qenë kryefjala e mediave në 9 ditë e fundit, duke bërë që të krijohet edhe një kakofoni informacionesh dhe imazhesh të shpërndara për publikun në lidhje me identitetin e grupit që mori përsipër vrasjen.
I gjithë kaosi u krijua pasi policia njoftoi zbardhjen e ngjarjes duke deklaruar se në vrasjen e 50-vjeçarit është përfshirë shqiptaro-britaniku Edmond Haxhia, së bashku me portugezin Ruben Saraiva, i cili shkrepin këmbëzën e pistoletës “TT” mbi Nikulajn dhe 4 shtetas britanikë që kanë luajtur rolin e vëzhguesit.
Ditën e djeshme qarkulloi gjerësisht një foto e mbërritur në numrat e gazetarëve dhe personazhi në të përflitej si vrasësi i Nikulajt.
Foto ishte shkëputur nga video e një individi me emrin Ruben Saraiva, i cili kishte postuar në Facebook një “reels” nga udhëtimi i tij me motor në Greqi dhe dyshimet lindën pasi ekzekutori i ngjarjes në Shëngjin ka dalë nga Shqipëria mbrëmjen e 19 prillit nga dogana e Kapshticës, duke kaluar në këmbë kufirin grek.
Por, Ruben Saraiva për të cilin u tha se ka ekzekutuar biznesmenin Nikulaj nuk ishte “killer” i vërtetë portugez, teksa ai vetë pas komenteve të shumta dhe publikimit të imazheve nga mediat reagoi në Tik Tok, duke sqaruar situatën.
Ai ka ripostuar video nga udhëtimet me motor dhe mbi to u bën apel mediave shqiptare që të fshijnë fotot e tij, duke pretenduar kështu se nuk është i njëjti Ruben Saraiva që akuzohet për vrasjen e Nikulajt.
“U bëj thirrje mediave shqiptare të mos njollosin emrin tim. Ju lutem, çfarë po beni, nuk e di çfarë po thurni atje. Përshëndetje nga Greqia, unë nuk jam një kriminel. Ky është një fake news, nuk kam lidhje me ngjarjen e ndodhur në Shqipëri. Lajme të rreme, fotot e mia po keqpërdoren nga mediat shqiptare”, shkruhet në postimet e tij.
Ndërkohë, pak orë pas reagimit të këtij shtetasi portugez, është publikuar nga News24 edhe imazhi i plotë dhe më i qartë i “killerit portugez, që përshtatet plotësisht me foton e mjetit të tij të identifikimit që policia publikoi.
Sakaq, mësohet se policia po kryen kërkime në një përrua në fshatin Kakarriq për armën e portugezit. Kërkimet nga RENEA dhe polumbarët po kryhen në vendin ku u gjet motori që u përdor prej Saraivës për t’u larguar nga vendi i ngjarjes.
Po sot janë bërë kërkime të tjera në banesën e Edmond Haxhisë dhe grupi hetimor ka mbledhur provat që konfirmojnë se Saraiva ka qëndruar në banesën e tij.
Rezulton se pasi ka kryer vrasjen, portugezi ka udhëtuar përreth 15 km dhe ka mbërritur në vendin ku ka hedhur motorin. Më pas ai është larguar drejt Shkodrës dhe ditën tjetër i shoqëruar nga një person ka lëvizur drejt Kapshticës për të udhëtuar drejt Greqisë.
Discussion about this post