Carlo Ancelotti shquhet për qetësinë e tij, por pas një fitore të tillë, me “poker” golash kundër Barcelonës në finale, është e vështirë të mos shfaqësh emocione. Tekniku italian shijon këtë trofe, i 11 te Real Madrid, ndërsa nuk harron të përkëdhel as Vinicius Jr, protagonistin absolut të këtij takimi: “Ishte një ndeshje e vështirë, nuk e prisja të kalonim në avantazh kaq shpejt. Shfrytëzuam linjën e tyre të lartë, gjithsesi rezultati është i ekzagjeruar për mënyrën se si luajti Barcelona. Titulli i 11-të te Reali? Jam i lumtur, por do të luftoj fort për të fituar titullin e 12-të.
Vinicius Jr? Luajti shumë mirë. Kishte nevojë për 2-3 ndeshje për t’u rikthyer në nivelin e tij më të mirë”, theksoi ndër të tjera Ancelotti pas ndeshjes.
Sigurisht, zhgënjimi ishte i madh në radhët e Barcelonës pas kësaj humbje të rëndë:
“Ka zhgënjim, trishtim, kemi luajtur ndeshjen më të keqe. Mund të rikuperonim, por goli i 3-1 e komplikoi garën, na bënë keq me kundërsulmet. Tani nuk na mbetet gjë tjetër vetëm të ri ngrihemi, e kemi bërë dhe më herët, Barcelona do të rikthehet”, u shpreh Xavi pas finales. Një humbje e tillë në finale, në “El Clasico” do të trondiste në themel stolin e çdo trajneri, por sipas Mundo Deportivo-s, Xavi nuk rrezikon, drejtuesit e klubit i kanë dhënë besim për të vijuar së bashku.
Discussion about this post