Teksa zgjedhjet parlamentare të 11 majit po afrojnë, KQZ ka nisur përgatitjet për procesin zgjedhor, ndërsa së fundmi ka publikuar edhe modelet e fletëve të votimit.
Këto janë modelet e fletëve të votimit që do të përdoren për qarqet e Tiranës, Fierit dhe Gjirokastrës.
Në fletë janë emrat e partive dhe emrat e kandidatëve të listës së hapur. Në Fier, janë 16 kutia të emrave të kandidatëve të listës së hapur, ku mund të votosh njërin prej tyre krahas partisë apo koalicionit. Ndërsa në Tiranë, secili koalicion apo parti ka 37 kandidatë të listës së hapur që mund të votohen, nga 49 kandidatë të mundshëm gjithsej për çdo parti apo koalicion. Madhësia e modelit të fletës për qarkun e Tiranës është 59 cm me 42 cm.
Ky është vetëm një model paraprak, pasi fleta zyrtare do aprovohet vetëm atëherë kur të ketë mbaruar regjistrimi i partive politike që do garojnë në zgjedhjet e 11 majit, si dhe të jenë plotësuar listat e kandidatëve për deputetë.
Prodhimi i fletëve të votimit nis më 25 mars, që vlerësohet si kohë e mjaftueshme që një një pjesë jo e vogël e tyre do të nisen me postë nëpër banesat e shqiptarëve, që do të votojnë nga jashtë vendit.
Deri tani janë miratuar afro 130 mijë kërkesa për votim nga jashtë, kryesisht nga Italia, Greqia, Gjermania, SHBA-ja, Mbretëria e Bashkuar dhe Franca, ndërsa mbi 36 mijë e 200 kërkesa janë refuzuar për pasaktësi në dokumenta, megjithë teknologjinë e lartë e të shumëllojshme për t’ua lehtësuar këtë proces.
Discussion about this post