Nëse Haaland “gërvishtet”, Manchester City “bëhet me zemër”. Sulmuesi është elementi kryesor (e jetik) i ekipit dhe një pjesë e madhe e suksesit që mund të arrijë skuadra e Pep Guardiolës në fund të sezonit do të varet nga prania e tij në fushë, nga golat e tij.
Norvegjezi ka humbur 3 ndeshje të Citizens këtë sezon për shkak të lëndimeve. Një në Champions League, në fazën e grupeve kundër Sevillas, për shkak të një ënjtjeje në këmbë dhe dy në Premier League.
Ai nuk luajti kundër Leicesterit, edhe për shkak të asaj mavijosjeje, as kundër Liverpoolit disa javë më parë për shkak të një dëmtimi në ijë.
Tani vjen pjesa e fundit e sezonit, ndeshjet vendimtare, dhe “Vikingu” nga Norvegjia duhet të jetë në super formë. Guardiola, trajneri i Cityt, shpjegoi kujdesin që ka klubi me sulmuesin, një lojtar që humbi 16 ndeshje te Borussia Dortmund sezonin e kaluar për shkak dëmtimesh.
“Unë nuk e di se çfarë ka bërë ai te Dortmundi, por ne kujdesemi për të 24 orë në ditë. Kemi mjekë dhe fizioterapistë të jashtëzakonshëm, ata janë pas tij çdo sekondë të ditës. Me këtë kalendar, ne duhet të kemi kujdes maksimal ndaj futbollistëve: me ushqimin, pushimin, gjumin,” shpjegoi Pep.
Discussion about this post