Shqiptari që u arrestua në Itali me 24 kilogram heroinë rezulton të jetë Fatos Hasku, një ish-efektiv policie. Hasku u prangos në portin e Ancona-s, pasi iu ushtrua një kontrolli nga karabinerët. Ai ishte nisur nga porti i Durrësit me heroinën e ndarë në 48 pako për ta tregtuar në Itali. Droga ishte fshehur në dyshemenë e mjetit të llojit “Mercedes Benz” që drejtohej nga Hasku, të cilën ai e kishte modifikuar dhe përshtatur për të fshehur lëndën narkotike.
Por, kontrolli në skaner në Ancona e fundosi. Autoritetet italiane i gjetën heroinën dhe e vunë në pranga. Makina është sekuestruar së bashku me drogën, ndërsa 50-vjeçari është dërguar në qelitë e paraburgimit. Hasku pritet të dalë në gjyq për tu njohur me masën e sigurisë.
Hasku ka punuar si efektiv në policinë kufitar, por në muajin maj të këtij viti është larguar nga detyra. Në vitin 2017 ai rezulton të jetë vënë nën hetim për përfshirje në trafikun e drogës. Tashmë po punohet për të gjetur bashkëpunëtorët e Haskut në Itali. Nuk dihet ende se kush e priste drogën nga ish-efektivi shqiptar në vendin fqinj.
Discussion about this post