Pas takimit me të dërguarin e Shteteve të Bashkuara të Amerikës, Gabriel Escobar, kryeministri Albin Kurti tha në një deklaratë për mediat se Kosova është e gatshme për të arritur një marrëveshje të ligjshme për normalizim të plotë të marrëdhënieve, me njohjen reciproke në qendër. Ndër të tjera, Kurti tha se Kosova e ka treguar se është palë konstruktive në procesin e dialogut me Serbinë.
“Vizita e dytë brenda dy dite e përfaqësuesve të SHBA-së. Me ambasadorin amerikan takohemi rregullisht, ndërsa në fillim të javës së shkuar pata një bisedë shumë të mirë telefonike me sekretarin e shtetit, Antony Blinken.
Me zotin Escobar folëm për rëndësinë dhe peshën e raporteve tona dypalëshe, partneritetin ndërmjet dy vendeve tona, progresin dhe reformat në Kosovë, ballafaqimin e krizës energjetike dhe për raportet ndërmjet Kosovës dhe Serbisë, procesin e dialogut dhe rrugën përpara”, tha Kurti.
Kreu i ekzekutivit të vendit tha se gjithmonë mirëpresin interesimin dhe angazhimin e Shteteve të Bashkuara në këtë proces.
“Jemi të gatshëm dhe të përkushtuar për arritjen e një marrëveshjeje ligjërisht të obligueshme për normalizim të plotë të marrëdhënieve, me njohjen reciproke në qendër… Me SHBA-të jemi aleatë në vlera dhe partnerë në qëllime…”, u shpreh Kurti.
Ai më tej theksoi se rreshtimi i menjëhershëm i Kosovës me SHBA-të, BE-në, dhe Mbretërinë e Bashkuar në vendosjen e sanksioneve ndaj Rusisë dhe mbështetjen e pa rezervë për Ukrainën përbëjnë dëshminë e aleancës dhe partneritetit Kosovë-SHBA dhe të njëjtën kohë dallimin me të gjithë ata të tjerët që nuk u rreshtuan siç duhet në anën e të drejtës e të vërtetës.
Discussion about this post