Eliminimi i Gjermanisë nga Kupa e Botës 2026 ka shkaktuar tronditje të madhe në futbollin gjerman.
Pas humbjes ndaj Paraguait dhe largimit nga turneu me penallti, Federata Gjermane e Futbollit ka reaguar me një komunikatë zyrtare.
Në qendër të vëmendjes është trajneri Julian Nagelsmann, i cili po përballet me kritika për mënyrën se si drejtoi skuadrën në momentet vendimtare.
Presidenti i Federatës, Bernd Neuendorf, konfirmoi se ka zhvilluar një takim të gjatë me trajnerin dhe drejtuesit e ekipit.
“Pas humbjes së hidhur kundër Paraguait dhe eliminimit nga Kupa e Botës në SHBA, Kanada dhe Meksikë, u ula për një kohë të gjatë me Julian Nagelsmann dhe ekipin e menaxhimit. Jemi dakord që paraqitja në Botëror nuk i përmbushi pritshmëritë tona”, deklaroi Neuendorf.
Kreu i Federatës bëri të qartë se situata do të analizohet në detaje dhe se nuk do të ketë një vazhdim sikur asgjë të mos ketë ndodhur.
“Pas një dështimi të tillë dhe duke marrë parasysh sfidat që na presin, ne nuk mund dhe nuk do të kthehemi thjesht në punë si normalisht”, shtoi ai.
Mediat gjermane raportojnë se pozita e Nagelsmann është dobësuar ndjeshëm pas një serie rezultatesh zhgënjyese në turnetë madhorë.
Federata pritet të shqyrtojë të gjitha opsionet në ditët e ardhshme, ndërsa e ardhmja e trajnerit në pankinën e Gjermanisë mbetet e pasigurt.
Vendimi përfundimtar pritet të përcaktojë nëse Nagelsmann do të ketë një tjetër mundësi për të rindërtuar kombëtaren apo nëse Gjermania do të nisë një epokë të re me një trajner tjetër.
Discussion about this post