Fredi Beleri u zgjodh në 14 maj si kryebashkiak i Himarës me një diferencë të ngushtë votash përballë rivalit socialist Jorgo Goro.
E ndërsa në Himarë numëroheshin votat, Beleri ishte arrestuar nga Policia dhe ndaj tij Gjykata e Vlorës kishte caktuar masën e arrestit me burg, duke e akuzuar se kishte blerë vota.
Sot GJKKO la në fuqi vendimin e Gjykatës së Vlorës, duke mbajtur në qeli Fredi Belerin, ndërsa avokatët e tij paralajmëruan se do të apelojnë vendimin ditën e mesërme.
Po çfarë pritet të ndodhë me Bashkinë e Himarës, ndërkohë që Beleri është në burg?
KQZ ende nuk ka marrë një vendim lidhur me vlefshmërinë e mandatit të Fredi Belerit si Kryebashkiak, por edhe të anëtarëve të Këshillit Bashkiak në Himarë. Por Ilirjan Celibashi në një deklaratë të pak ditëve më parë tha se Beleri është kandidat fitues dhe nëse nuk do ketë kontestime dhe do të konfirmohet ky rezultat, ai konsiderohet i mandatuar për të drejtuar bashkinë.
“Situata e tij juridiko penale nuk ka të bëjë me procesin zgjedhor. Më tej do të flasim nëse do të ketë zhvillime të reja”, paralajmëroi pak ditë më parë Celibashi.
Por referuar vendimit të sotëm të GJKKO-së, sipas të cilit Fredi Beleri, do të duhet të qëndrojë në burg, duket se palët do të duhet të presim një vendim nga Apeli i GJKKO, për të marrë hapa të mëtejshëm lidhur me atë se çfarë do të ndodhë me Bashkinë e Himarës.
Deri në momentin që nuk ka një vendim gjykate për fajësinë e Belerit ai është i pafajshëm, por nëse nuk i ndryshon masa e sigurisë, ai nuk do të mund të marrë zyrtarisht detyrën, qoftë edhe duke u betuar para Këshillit Bashkiak.
Në kushte të tilla duket se kryebashkiaku në detyrë, Jorgo Goro do të vijojë të mbajë funksionin e kryebashkiakut, ndoshta duke u përsëritur e njëjta situatë si në Shkodër, ku Voltana Ademi qëndroi në funksionin e Kryebashkiakes rreth dy vite pas përfundimit të mandatit për shkak të problemeve ligjore që pati kandidati socialist Valdrin Pjetri.
Një mundësi është që Qeveria mund të shkarkojë me një vendim Fredi Belerin nga pozicioni i Kryebashkiakut, megjithëse ka edhe një vendim të Gjykatës Kushtetuese, që ka rrëzuar pikërisht VKM e Edi Ramës. Ky i fundit shkarkoi nga detyra Zef Hilën në kohën që ishte Kryebashkiak i Vaut të Dejës, në vitin 2019, por dy vite më pas Kushtetuesja e ka shfuqizuar këtë vendim.
Në kushte të tilla, duket se vetëm një përshpejtim i procesit gjyqësor të nisur ndaj Belerit mund të japë një zgjidhje të situatës lidhur me Bashkinë e Himarës. Nëse çështja zvarritet, duket se do të përsëritet skenari i Shkodrës, deri kur Gjykata mund të japë vendimin, pro apo kundër Belerit.
Nëse shpallet i fajshëm, atëherë do të duhet që në Bashkinë e Himarës të mund të përsëriten zgjedhjet vetëm për postin e Kryebashkiakut.
Discussion about this post