Gjykata e Posaçme ka lënë në fuqi masën “arrest shtëpie” për kryetarin e Bashkisë Tropojë, Rexhë Byberi. E njëjta masë sigurie është caktuar edhe për nënkryetarin e Bashkisë së Tropojës, Abedin Kërnaja, teksa akuzohen për kryerjen e veprës penale “Shpërdorimi i detyrës”, e kryer në bashkëpunim.
Pas daljes nga SPAK, Rexhë Byberi deklaroi se nuk ka kryer asnjë vepër penale dhe se nuk ka shkelur ligjin.
“Përshëndes popullin e Tropojës”, ka thënë ai mes tjerash.
Kryetari dhe nënkryetari i bashkisë akuzohen për hapjen e rrugës së re “Stacioni i Anijes Palç- Guri i Lules”, ku sipas SPAK, punimet janë bërë në kundërshtim me aktet ligjore dhe nënligjore, të miratuara me vendim të Këshillit Bashkiak dhe prefektit të Qarkut Kukës.
Sipas hetimeve të Prokurorisë së Posaçme, nga kryerja e aktit të ekspertimit ka rezultuar se hapja e rrugëve sipas projekteve të miratuara nga Këshilli Bashkiak është bërë në kundërshtim me aktet ligjore e nënligjore në fuqi duke sjellë një dëm prej 277. 611.520 Lekë.
Rasti i Rexhë Byberit është denoncuar nga emisioni televiziv “Piranjat”, teksa është i ngjashëm me rastin e ish-kryebashkiakut të Fushë Arrëzit, Fran Tuci, i cili u dënua me 1 vit burgim nga GJKKO.
Hetimet
Prokuroria e Posaçme kundër Korrupsionit dhe Krimit të Organizuar njoftoi mbrëmjen e të hënës më 9 shtator caktimin e masës së sigurimit personal “arrest në shtëpi” ndaj kryetarit dhe nënkryetarit të Bashkisë së Tropojës, të akuzuar për “shpërdorim detyre”, pasi kanë kryer veprime e mosveprime që konsiderohen si mospërmbushje e rregullt e detyrës, në kundërshtim me aktet ligjore dhe nënligjore në fuqi.
Sipas SPAK, dyshohet se paligjshmëritë për të cilat akuzohen kryebashkiaku i Tropojës, Rexhë Byberi dhe zëvendësi i tij, Abedin Kraja kanë të bëjnë me hapjen e rrugëve sipas projekteve të miratuara nga këshilli bashkiak.
Konkretisht, janë evidentuar punime në kundërshtim me ligjin dhe aketet nënligjore për rrugët “Stacioni i Anijes Palç- Guri i Lules” dhe “Qafë Murrizi –Qafë Agri”. SPAK sjpjegon se për kryerjen e punimeve në këto rrugë duhej të aplikohej në sistemin elektronik ‘e-leje’, pranë Bashkisë Tropojë, si institucion vendor që ka tagrin të shqyrtojë dhe miratojë lejen e ndërtimit të infrastrukturës, pasi të ketë verifikuar plotësimin e dokumentacionit të nevojshëm tekniko-ligjor nga aplikuesi, për këto lloj punimesh. po ashtu, sillet në vëmendje se Bashkia Tropojë duhej të bashkëvepronte me institucionet e tjera kompetente për ndërtimin e rrugës, konkretisht me Agjencinë Kombëtare të Mjedisit, për nevojën e hartimit të Raportit të Vlerësimit të ndikimit në mjedis, të bashkëvepronte me ministrinë e linjës për impaktin e ndërtimit të rrugës së re dhe pasojat e këtyre punimeve të ndërtimit.
“Nga kryerja e aktit të ekspertimit ka rezultuar se hapja e rrugëve sipas projekteve të miratuara nga Këshilli Bashkiak është bërë në kundërshtim me aktet ligjore e nënligjore në fuqi duke sjellë një dëm prej 277. 611.520 (dyqind e shtatëdhjetë e shtatë milion e gjashtëqind e njëmbëdhjetë mijë e pesëqind e njëzet) Lekë”, citohet në njoftim.
Bazuar në këto rezultate të hetimit paraprak, SPAK ka kërkuar caktimin e masave të sigurimit personal “arrest në shtëpi” për dy të hetuarit Rexhe Byberi dhe Abedin Kraja, kërkesë që është pranuar nga gjykata respektive.
Rexhë Byberi u zgjodh kryetar i Bashkisë Tropojë fillimisht në zgjedhjet pa garë të vitit 2019. Më parë ai kishte qenë për 15 vjet kryetar i Komunës Margegaj për llogari të Partisë Demokratike, por si kryetar i Bashkisë Tropojë është zgjedhur nën siglën e Partisë Socialiste.
Discussion about this post