Gerti Shehu, 31-vjeçari i cili dhunoi me grusht Sali Berishën ditën e djeshme gjatë protestës së opozitës, ka folur për herë të parë para uniformave blu ku ka pohuar se ndodhet në gjendje jo të mirë shëndetësore.
“Do flas në një moment të dytë, sepse nuk jam mirë nga gjendja shëndetësore”, kështu ka deklaruar Shehu duke mos dhënë më shumë detaje rreth sulmit që u bë kryefjalë e lajmeve të djeshme.
Kujtojmë se Gerti Shehu, 31-vjeç sulmoi kreun e PD-së Sali Berisha, teksa ky i fundit ishte duke marshuar drejt bulevardit “Dëshmorët e Kombit” për të marrë pjesë në protestë. 31-vjeçari goditi me grusht në fytyrë Berishën duke e gjakosur.
Ai u ndalua menjëherë nga truprojat e Berishës dhe ndërkohë u dhunua nga mbështetës dhe simpatizantë të PD. 31-vjeçari u shoqërua nga policia dhe mori mjekim në spitalin e Traumës, pasi ka dëmtime në fytyrë dhe fraktura në hundë.
Dyshohet se 31-vjeçari vuan nga probleme të shëndetit mendor, të paktën ky ishte reagimi i djeshëm i policisë, ndërsa vetë Berisha e quajti atë një agjent policie të porositur nga kryeministri Edi Rama.
Nga ana tjetër, nëna e Gert Shehut tha se ishte hera e parë që djali ishte përfshirë në një situatë të tillë agresive. Ermira Shehu thotë se djali i saj ka qenë i stresuar dhe kurohej, por nuk kishte shfaqur kurrë sjellje agresive.
Discussion about this post