Mungesa e Gjykatës Kushtetuese për një kohë të gjatë në vendin tonë për shkak të Vettiungut, ka sjellë një mal me dosje në institucionin më të lartë kushtetues. Por me t’u plotësuar numri i nevojshëm i gjyqtarëve për të shqyrtuar çështje në themel, ky institucion ka nisur punën vrullshëm, sidomos me dosjet e mbartura prej vitesh.
Në 6-mujorin e parë të këtij viti, Gjykata Kushtetuese ka arritur të marrë 28 vendime përfundimtare. Por nga këto vendime rezulton se 13 prej tyre janë kërkesa të regjistruara në vitin 2018, kur ajo nuk ishte funksionale. Ndërkohë, sipas shifrave të bëra publike nga Gjykata Kushtetuese rezulton se 88 çështje nuk kanë kaluar për gjykim, 76 prej të cilave janë të regjistruara në vitet 2020 – 2021.
Ndërkohë, për 6-mujorin e parë të 2021-shit janë regjistruar gjithsej 68 kërkesa shumica nga subjekte për proces të parregullt ose për papajtueshmëri të ligjeve. Gjykata është vënë më shumë në lëvizje gjatë kësaj periudhe nga individët, të cilët kanë paraqitur 56 nga 68 kërkesa në total.
Partitë politike kanë paraqitur vetëm dy kërkesa, ndërsa Kuvendi dhe Avokati i Popullit kanë paraqitur nga një kërkesë. Aktualisht, numri total i kërkesave që presin të shqyrtohen nga kjo Gjykatë është 27, nga të cilat 8 kërkesa janë në shqyrtim në seancë plenare dhe 2 kërkesa janë në shqyrtim paraprak në Mbledhjen e Gjyqtarëve. 17 kërkesa janë në fazën e shqyrtimit paraprak nga Kolegjet e Gjykatës Kushtetuese.
Por interesi publik mbetet pikërisht te çështjet e nxehta politike, ku disa prej tyre janë ankimuar nga Presidenti i Republikës, i cili nga ana tjetër është në gjendje pritje për vendimin e Kuvendit të Shqipërisë për shkarkimin e tij. Një nga çështjet e nxehta, e cila ende nuk është futur në axhendën e Gjykatës Kushtetuese, është ajo e zgjedhjeve lokale më 30 qershor të vitit 2019, në të cilat nuk mori pjesë opozita, duke i dhënë shansin mazhorancës që të marrë në dorë të gjitha bashkitë e vendit, një bonus politik, i cili u vu re më së miri në zgjedhjet parlamentare të këtij viti.
Por, nga ana tjetër mbetet dhe vendimi i marrë nga Kuvendi i Shqipërisë për shkarkimin e Presidentit Meta, i cili ende nuk është shqyrtuar nga Gjykata Kushtetuese, ndërsa ai vazhdon të kryejë detyrën si kreu i shtetit, por nga ana tjetër pret nëse Kushtetuesja do të pranojë vendimin e Kuvendit, para vitit 2022, kur atij i mbaron mandati 5-vjeçar. Por, duke parë se Gjykata Kushtetuese ka trajtuar gjatë gjashtë muajve çështje edhe të vitit 2021, duket sikur çështja e shkarkimit të Metës është lënë mënjanë për momentin, ndoshta me qëllim që ai të përfundojë mandatin 5-vjeçar. Megjithatë, pas zhvillimeve të fundit që lidhen me dënimin e ish Prokurorit të Përgjithshëm, Adriatik Llalla, i cili ka qenë një emër i mbështetur nga Meta, shumë gjëra mund të ndryshojnë kursin dhe në Gjykatën Kushtetuese. Gijotina.com
