Gjykata Kushtetuese ka reaguar sot në 7 shtator për debatet e fundit mbi pagat e magjistratëve, duke kërkuar zbatimin e vendimit të saj nr. 15, e dhënë në datë 17 shkurt 2026.
Në deklaratën për mediat, Kushtetuesja thekson se vendimi i saj ka përcaktuar tashmë standardin kushtetues që duhet të ndiqet për këtë çështje.
Kushtetuesja i kujton Kuvendit, detyrimin për të zbatuar vendimin. Sipas saj, arsyetimi dhe dispozitivi i vendimit përbëjnë qëndrimin zyrtar të Gjykatës dhe duhet të lexohen e të zbatohen në tërësinë e tyre.
GJK nënvizon se vendimet e saj janë përfundimtare dhe të detyrueshme për zbatim nga autoritetet përkatëse.
“Në lidhje me diskutimet publike për çështjen e pagave të magjistratëve, Gjykata Kushtetuese vlerëson të nevojshme të sqarojë se për këtë çështje është shprehur tashmë me vendimin nr. 15, datë 17.02.2026.
Përmes këtij vendimi, Gjykata Kushtetuese ka përcaktuar standardin kushtetues të zbatueshëm, duke evidentuar njëkohësisht detyrimet që burojnë prej tij për autoritetet përgjegjëse. Arsyetimi dhe dispozitivi i vendimit përbëjnë qëndrimin zyrtar të Gjykatës për çështjen e shqyrtuar dhe, për rrjedhojë ato duhet të lexohen e të zbatohen në tërësinë e tyre, në përputhje me parimet kushtetuese të përcaktuara në të.
Gjykata rithekson se vendimet e saj janë përfundimtare dhe të detyrueshme për zbatim. Respektimi dhe zbatimi i tyre përbën një kërkesë të drejtpërdrejtë të rendit kushtetues dhe është i lidhur ngushtësisht me parimin e shtetit të së drejtës dhe të sigurisë juridike.
Në këtë kuptim, Gjykata sqaron se mënyra e përllogaritjes dhe e ekzekutimit të pagave në administrimin e brendshëm të saj, në varësi të fondeve buxhetore në dispozicion, nuk mund të interpretohet si përcaktuese për efektet juridike të vendimit nr. 15, datë 17.02.2026 dhe as për detyrimet që ky vendim sjell për autoritetet përgjegjëse për zbatimin e tij”, thuhet në njoftimin e gjykatës.
Discussion about this post