Gjykata liron nga akuza katër ish-ministra të Kosovës

Lirohen nga akuza katër ish-ministra të qeverisë së Kosovës. Mbi ta rëndonte vepra penale e “keqpërdorimit të detyrës zyrtare”, në rastin e njohur si ‘Afera e Hidrocentraleve’.

Gjykata Themelore në Prishtinë ka liruar nga akuza ish-ministrat: Mimoza Kusari Lila, Nenad Rashiq, Besim Beqaj dhe Dardan Gashi.

Shpallja e aktgjykimit për këtë rast është bërë të martën nga kryetari i trupit gjykues, Valon Kurtaj. “[Ata] janë liruar nga akuza, pasi që gjykata nuk ka gjetur prova se të njëjtit kanë kryer veprat penale për të cilat janë akuzuar nga Prokuroria Speciale e Republikës së Kosovë”, thuhet në njoftimin e Gjykatës Themelore, më 8 nëntor.

Lexo edhe: “Na mbante ligjërata”, Haradinaj tregon pse iku nga takimi me Kurtin

Në prill të vitit 2020, Prokuroria kishte ngritur aktakuzë kundër 19 personave. Përfshirë edhe ish-ministrat e Qeverisë, që në atë kohë udhëhiqej nga ish-kryeministri Hashim Thaçi.

Ata ishin anëtarë të Komitetit Qeveritar për Privatizim, dhe akuza që rëndonte mbi ta ishte se në cilësi të personave zyrtar kanë tejkaluar kompetencat e tyre në këtë komision.

Sipas aktakuzës ata njëzëri kishin votuar që hidrocentralet të cilat prodhojnë energji elektrike si: hidrocentrali i Lumbardhit, hidrocentrali në Burim, Hidrocentrali i Radavcit dhe hidrocentrali “Dikance”, të transferohen tek Kompania Kosovare të Distribucionit dhe Furnizimit me Energji Elektrike (KKDFE) dhe më pas të privatizohen nga kompania “Limak-Calik”.

“Me nënshkrimin e këtyre marrëveshjeve është përmbyll procesi i privatizimit të KKDFE-së. Përkundër faktit se të njëjtat nuk është dashur të tranferohen dhe privatizohen. Për arsye se një veprim të tillë e ndalon baza ligjore”, thuhej në njoftimin për aktakuzë të vitit 2020.

Sipas organit të akuzës, dëmi tjetër i shkaktuar nga personat e akuzuar është është vlera e investuar (shtuar) në hidrocentrale prej 12,628,166.41 euro. Që nuk përfshinë vlerën e aseteve para koncesionit. Sipas prokurorisë, KEK-u nuk ka bërë regjistrimin dhe nuk ka prezentuar vlerën e aseteve para privatizmit. “Ky dëm dëm edhe më tutje vazhdon të shkaktohet në mënyrë të përhershme”, kishte vlerësuar Prokuroria Speciale.