Gjykata Speciale e Hagës liron Haxhi Shalën, një nga ish-drejtuesit e UÇK

Njëri ndër ish-komandantët e UÇK-së, Haxhi Shala, është liruar nga Gjykata Speciale ku po mbahej në paraburgim.

Haxhi Shala u lirua sot më 10 shkurt 2026 dhe u kthye në Kosovë, pas vendimit të Kryetares së Dhomave të Specializuara të Kosovës (DHSK), gjykatëse Ekaterina Trendafilova, për modifikimin e dënimit të tij më 2 shkurt 2026.

Në lidhje me këtë ngjarje ka reaguar edhe Organizata e Veteranëve të Luftës së Ushtrisë Çlirimtare të Kosovës. Përmes një postimi, ata i urojnë mirëseradhjen ish-luftëtarit, Haxhi Shala.

“Mirë se vjen, bashkëluftëtar! Të urojmë shëndet dhe gjitha të mirat në jetë pranë familjes dhe njerëzve të tu”, shkruan OVL e UÇK-së.

Lirimi u bë me kushte, të cilat do të zbatohen për pjesën e mbetur të dënimit prej tre vjetësh, njoftojnë Dhomat e Specializuara.

Sipas njoftimit Gjykatësja Trendafilova mori parasysh shenjat e rehabilitimit të Haxhi Shala, letrën e tij ku shprehte keqardhje ndaj të prekurve nga veprimet e tij, marrëdhëniet familjare pozitive dhe rrjetin e tij shoqëror, që sipas saj tregojnë perspektivë të arsyeshme rehabilitimi.

Megjithëse veprat për të cilat Shala u shpall fajtor konsiderohen të rënda, Gjykatësja Trendafilova vlerësoi se iniciativa e tij për të shkruar letrën ishte e vetëdijshme dhe pa ndihmë ligjore, si një distancim i sinqertë nga veprat penale.

Sipas ligjit, procedurat për ulje, modifikim ose ndryshim të dënimeve janë individuale, dhe shqyrtimi bëhet vetëm pasi një person ka vuajtur dy të tretat e dënimit.

Shala u akuzua për vepra penale kundër administrimit të drejtësisë.

Më 13 dhjetor 2023, ZPS-ja dorëzoi kërkesë për bashkimin e çështjes Januzi dhe Bahtijari me çështjen Haxhi Shala Më 4 shkurt 2025, Trupi Gjykues miratoi marrëveshjet për pranimin e fajësisë dhe shqiptoi dënimet: Haxhi Shala u dënua me 3 vjet burgim.

Ndryshe Kryetarja e Dhomave të Specializuara të Kosovës (DHSK), Gjykatëse Ekaterina Trendafilova, vendosi më 11 dhjetor 2025 se dënimi i Haxhi Shalës nuk do të ulet apo të modifikohet pas vuajtjes së dy të tretave të dënimit të tij./ RTK