Policia e Tiranës ka njoftuar se ka shoqëruar 3 persona, njëri prej të cilëve minoren në lidhje me dhunën e ushtruar ndaj një 17-vjeçari, nëpërmjet pamjeve që qarkulluan në rrjetet sociale.
Ngjarja e rëndë ka ndodhur në vendin e quajtur Kthesa e Kamzës, ndërsa të ndaluarit janë personat me inicialet E. M., 16 vjeç, I. M., 42 vjeç, dhe A. Sh., 40 vjeç, të tre banues në Tiranë, për veprën penale “Plagosja e lehtë me dashje”, e kryer në bashkëpunim.
Sipas njoftimit të policisë, këta persona në bashkëpunim me njëri-tjetrin, ditën e sotme, për motive të dobëta, janë konfliktuar me shtetasin G. N., 17 vjeç, dhe më pas e kanë goditur me grushte dhe sende të forta.
Drejtoria Vendore e Policisë Tiranë ka falenderuar mediat dhe qytetarët që denoncojnë rastet e paligjshmërisë dhe i fton sërish ata që të denoncojnë çdo rast paligjshmërie në Komisariatin Dixhital dhe në numrin 112, duke garantuar fshehtësinë e denoncuesit dhe reagim të menjëhershëm e të paanshëm.
Discussion about this post