Mbrëmjen e shkuar janë grabitur zyrat e Këshillit të Qarkut në Vlorë, ku një person ka hipur në tarracë, ka thyer dritaret e më pas ka hyrë brenda. Autori ka hyrë në zyrat e arkivit, aty ku janë marrë disa dosje, teksa po bëhet inventari për të zbuluar se cilat dokumente mungojnë. Deri më tani policia nuk ka mundur të zbulojë dot autorin, teksa kanë nisur hetimet në lidhje me ngjarjen. Aktualisht janë mbledhur kamerat e sigurisë, si dhe provat e ndryshme materiale. Nga burimet bëhet me dije se dyshohet që autor i grabitjes të jetë një i ri.
Nga uniformat blu bëhet me dije se ka qenë një person, i cili ka thyer xhamat e dritareve me mjete të forta. Ai ka thyer zyrën e pronave, ku janë dosjet për administrimin edhe mbrojtjen e tokës. Zyra, e cila është vjedhur cilësohet si ndër më të rëndësishmet e këtij institucioni. Grabitja është konstatuar nga roja, i cili bën me dije se autori ka hyrë nga dritarja, por më pas është larguar nga dera kryesore.
Të tjera detaje janë zbardhur nga grabitja e regjistruar mbrëmjen e shkuar në Vlorë, ku sipas burimeve bëhet me dije se autori ka qenë i armatosur. Ndër të tjera, informohet se autori ka mbajtur peng përreth 30 minuta rojën e institucionit, e më pas është larguar me vrap.
Aktualisht po vijon inventari në arkivin e Këshillit të Qarkut në Vlorë, ku raportohet se janë zhdukur dokumente origjinale të tokave në bregdet. Nga burimet, dyshohet se autori i grabitjes të jetë ndihmuar nga persona brenda institucionit. Kjo për shkak se brenda zyrave, nuk është dëmtuar asgjë e madje nuk është shkaktuar rrëmujë. Autori ka marrë vetëm dosjet dhe është larguar nga dera kryesore.
