GJKKO ka dënuar me 25 vite burg Aleks Pepën, për grabitjen e 990 mijë eurove në aeroportin e Rinasit. Dënimi i tij është dhënë në mungesë, pasi ai vijon të jetë në kërkim ndërkombëtar.
Pepa akuzohet për grup kriminal dhe vjedhje me dhunë.
Në muajin shkurt të 2017-ës, policia dhe prokuroria bënë një kontroll të imtësishëm në banesën e prindërve të Aleks Pepa, ku gjetën 50 mijë euro brenda në frigorifer.
Kush është Aleks Pepa?
Ai ka punuar si emigrant në Greqi, por në vitin 2015 u kthye në Shqipëri dhe akuzohet si personi kryesor në grabitjen e Rinasit. Sipas policisë ai ka pasur edhe dy bashkëpunëtorë gjatë grabitjes, e ku raportohet se pas ngjarjes është larguar drejt Rumanisë, por ende nuk ka një vendndodhje të saktë të tij.
Ngjarja në fjalë ka ndodhur në 30 qershor 2016, ku disa persona të armatosur çanë rrethimin e aeroportit e vunë në zbatim planin e tyre për të grabitur 900 mijë euro. Automjeti që u fut brenda, ishte një “Benz Mercedes” i kuq, ku pasagjerët ishin të armatosur. Ka qenë dhe një bashkëpunëtor të tretë, i cili i priste jashtë pistës së aeroportit, me një tjetër makinë të vjedhur. Ky person, ka pasur rolin e ndihmësit, për largimin e të tyre dhe humbjes së gjurmëve. Sipas prokurorisë, grabitësit kanë përdorur katër automjete të vjedhura.
Makinat e vjedhura janë marrë në Pogradec, dy në Elbasan dhe një furgon në Durrës. Të tre autorët i kanë ndërruar makinat herë pas herë me qëllim humbjen e gjurmëve dhe shmangies së kontrolleve të policisë. Ata kanë arritur t’ia dalin më së miri, pasi kur janë mbushur më shumë se 5 vjet nga ngjarja, asnjëri prej autorëve nuk është arrestuar nga policia. Në lidhje me dinamikën e ngjarjes, dyshohet se Pepa së bashku me njërin pre anëtarëve të tjerë të grupit, këputën me darë çelësat e portës së rrethimit të aeroportit, ku më pas hynë me automjetin e kuq. Pasi hynë brenda rrethimit, ata shkuan tek automjetet e kompanisë së sigurisë e cila do të bënte transportin e parave.
Pepa dhe bashkëpunëtorët e tij sulmuan më pas me armë efektivët e sigurisë të cilët bënin ruajtjen e parave, e më pas të maskuar e me rroba të zeza shpërthyen derën dhe morën 990 mijë eurot.
Aleks Pepa u rikthye sërish në skenë, ku së bashku me Admir Muratajn vodhën 6 mln euro nga një avion në Rinas. Gjatë kësaj ngjarje, Murataj mbeti i vrarë si pasojë e shkëmbimit të zjarrit me policinë.
