Përfaqësuesi ligjor i grupit të Enkelejd Alibeajt, Indrit Sefa ka mbërritur në KQZ. Sefa tha se do të shkojë në KQZ, që të bëjë regjistrimin në zgjedhje të Partisë Demokratike të Shqipërisë. Ai deklaroi se po bëhet regjistrim dhe do të ndiqen procedurat, njësoj siç veprohet me partitë e tjera.
“Ta vlerësojë situatën komisioneri, është praktikë e përcaktuar në Kod. Kjo është një praktikë e ndjekur nga të gjitha partitë politike”, tha Sefa.
Partia Demokratike e transferon tashmë përballjen në dyert e Komisionit Qendror të Zgjedhjeve. Dje, kryetari i Partisë Demokratike, Sali Berisha bëri dje regjistrimin e PD në zgjedhje ndërsa sot, përfaqësuesi ligjor i Enkelejd Alibeajt, Indrit Sefa do të dorëzojë kërkesën për t’u regjistruar në KQZ, 3 ditë pas vendimit të gjykatës së Apelit që ktheu çështjen për rigjykim, duke e lënë PD në zgjedhje me vulën, siglën dhe logon tek Lulzim Basha.
Por Berisha ka zgjedhur një tjetër rrugë. Ai dorëzoi dje në mbrëmje dokumentacionin në KQZ, ku u vu re se Berisha firmosi kërkesën për regjistrim si kryetar i Partisë Demokratike dhe i vetmi person me të drejtë ligjore për të bërë regjistrim kandidatësh. Regjistrimi sipas PD do të bëhet me koalicion, ndërsa pika e ngërçit lidhet me regjistrimin e kandidatëve për këshillat Bashkiakë.
Tashmë beteja është zhvendosur dhe bëhet në KQZ, ku deri më tani janë regjistruar 30 parti për t’u regjistruar në zgjedhjet lokale të 14 majit. Afati është 6 marsi ndërsa më 15 mars skadon afati për koalicionet dhe më 27 mars për Këshillat Bashkiakë.
Discussion about this post