Berisha: Shumë shpejt ‘binomi i hajdutëve’ do marrin ndëshkimin që meritojnë!

Kohë leximi: 2 min

Kryedemokrati, Sali Berisha, deklaroi sot se Edi Rama po vazhdon të mbrojë jo vetëm Belinda Ballukun, por edhe veten e tij, familjen dhe rrethin e ngushtë, pas skandaleve ku janë përfshirë.

Në një konferencë për mediat, Berisha u shpreh se sipas tij, Rama është bërë barcaletë në mediat ndërkombëtare, ndërsa bashkë me Ballukun janë kthyer në binomin e hajdutërisë.

Berisha theksoi kontrollin e pushteteve nga Rama ndërsa u shpreh se bashkë me Ballukun do të marrin, sipas tij, ndëshkimin që meritojnë.

“Duke u lidhur me kartelet e drogës e shndërroi shtetin në farsë zgjedhore, e shndërroi shtetin në mburojë në mbrojtje të rrethit të tij dhe familjarëve të tij dhe nëpërmjet kësaj po mbyll dyert e Shqipërisë në integrimin evropian. Rama në mediat ndërkombëtare është bërë barcaletë tani siç e keni bërë me citimet që ai bën.

Dje tha se shpata e drejtësisë është në zyrën time, ta kuptojnë mirë partnerët tanë se çfarë drejtësie ka Shqipëria. Ai është famzi, me ato që bën me Lubi Ballukun si te legjenda, ata shkojnë si binom hajdutësh të cilët i garantoj se së shpejti do marrin atë që meritojnë nga qytetarët shqiptarë”, tha Berisha.

Berisha u pyet sot nga gazetarët gjatë konferencës për shtyp edhe për protestën kombëtare të opozitës më 17 prill.

Ai tha se do të jetë revolta më e fuqishme e shqiptarëve për të rrëzuar regjimin dhe se qëllimi i vetëm i opozitës është të mbrojë interesat e qytetarëve, të shtetit ligjor dhe nga katastrofa ekonomike që po ndodh.

“Do të jetë revoltë e fuqishme e qytetarëve shqiptarë në mbrojtje të interesave të tyre më jetike, luftës kundër korrupsionit dhe mbrojtjes së shtetit ligjor, mbrojtjes nga vjedhjet, mbrojtjes së vokacionit të tyre perëndimor por edhe të gjendjes së tyre, nga katastrofa ekonomike që po ndodh”, u shpreh kreu i PD-së shkurtimisht.