Hetimet e SPAK, Balluku: Jemi në një moment të mirë

Zv.kryeministrja Belinda Balluku ka komentuar progres raportin të Komisionit Europian të vitit 2023 për Shqipërinë.

Në një intervistë për emisionin “Review” në Euronews Albania, ajo u ndal te SPAK duke thënë se ky institucion po heton disa raste.

Ajo nënvizoi se Shqipëria është në një moment shumë të mirë për luftën kundër krimit të organizuar, por që mbetet një nga problematikat më të mëdha për t’u hetuar.

“Ka raste që SPAK sërish është duke hetuar që janë bërë publike. Ka banda të tëra janë çmontuar, por sigurisht kjo mbetet një fushë që nevojiten një shkëmbim shumë i madh me partnerët. Jemi në një moment shumë të mirë për luftën kundër krimit të organizuar, por që mbetet një nga problematikat më të mëdha për t’u hetuar”, tha Balluku.

Zv.Kryeministrja nënvizoi faktin që në krahasim me një vit më parë janë sekuestruar 38 milionë asete.

“Korrupsioni pa dyshim është një dukuri shumë e vështirë për t’u luftuar. Sot që flasim jemi në momentin më të mirë përsa i përket luftës kundër korrupsionit. Procesi i vettingut është drejt përfundimit. SPAK po funksionon. SPAK ka hetuar një sërë zyrtarësh të lartë, duke rritur numrin për vitin e kaluar.

E njëjta gjë është për luftën kundër korrupsionit dhe krimit të organizuar të cilat kanë dalë me vendime dënimi ndaj zyrtarëve të lartë. Totali i aseteve të sekuestruara është 38 milionë, në raport me 21 milionë euro që ka qenë një vit më parë. 80% më shumë se një vit më parë.

Po ashtu Drejtoria e Përgjithshme e Antikorrupsionit ka bërë 20 denoncime në Prokurori. Ne se kemi për detyrë të kapim korruptuarit, ne i identifikojmë dhe i çojmë në SPAK”, tha ajo.