Ditën e sotme dy prokuroret e Elbasanit, Ermira Tafani dhe Armanda Xhaferri kanë paraqitur dorëheqjen pranë Këshillit të Lartë të Prokurorisë.
Burime për mediat bëjnë me dije se dy prokuroret nuk kanë dhënë arsye për dorëheqjen e tyre, por dyshimet janë për shkak të frikës nga vettingu si dhe ngarkesa në punë.
Por kush janë dy prokuroret?
Ermira Tafani, prokurore prej 21 vitesh në Elbasan ka qenë një nga kandidatet për zëvendësimin e Adriatik Llallës në krye të Prokurorisë së Përgjithshme.
Para se të ndërmerrte këtë hap emri i saj bëri xhiro në media, me dyshime se ishte e përfshirë në një skemë korrupsioni. Në 31 janar 2017, një emision investigativ në vend emisioni investigativ në vend transmetoi një rast korruptiv, kur një oficer i policisë gjyqësore në Elbasan mori nën dorë 2000 euro, për lirimin e një personi nga paraburgimi. Këto para, sipas tij, duheshin për prokuroren Ermira Tafani dhe gjyqtaren Pajtime Fetahu. Por, ky denoncim nuk e pengoi Tafanit që të kërkonte ngritje në detyrë edhe pse nuk arriti të zgjidhej pasi u rrëzua nga Vettingu parlamentar.
Kujtojmë se një nga dosjet e bujshme që ka hetuar prokurorja Ermira Tafani është ajo e bandës se Kateshit që gjatë 1997 mori në kontroll Elbasanin. Gjithashtu prokurorja Tafani ka hetuar edhe Maksude Kadenën, e njohur si Sudja, një nga çështjet më të bujshme të firmave piramidale, që u përcoll më pas në Tiranë.
Ndërsa Armanda Xhaferri, ka qenë e akuzuar për zhdukjen e tri dosjeve, dy për pastrim parash dhe një për abuzim me fondet e një rruge, të cilat e kanë çuar në dyert e Policisë, pasi ishte konstatuar se në zyrën e saj mungonin tre fashikuj, që i kishin mbërritur nga Njësia Task Forcë.
Para hetuesve ajo ka pretenduar se bëhet fjalë për dosjet tejet të rëndësishme dhe me impakt të lartë publik, e për këtë arsye këmbëngul që hetimin e këtyre çështjeve duhet ta vijojë ajo. Për këtë arsye, ka refuzuar të bëjë dhe dorëzimin e fashikujve, të cilët më pas nuk i ka gjetur në zyrën e saj të punës, por janë marrë prej andej nga administrata e Prokurorisë dhe i janë dorëzuar një tjetër prokurori.
Për këtë në maj të këtij viti, Prokurori i Përgjithshëm Olsian Çela i ka kërkuar Inspektorit të Lartë të Drejtësisë inspektimin për hetimin e shkeljeve individuale të kryera në ushtrimin e detyrës nga ana e prokurores Armanda Xhaferri.
Gijotina.com
