Xi Jinping është konfirmuar si lider i Kinës për një mandat të tretë historik, pasi një takim politik njëjavor “eliminoi” rivalët kryesorë dhe forcoi fuqinë e tij politike. Presidenti Xi Jinping do të mbetet në pushtet duke thyer një precedent më shumë se një dekadë, që kufizon qëndrimin e liderëve kinezë në detyrë.
Pasi ka drejtuar Kinën për 10 vite me radhë ai do të jetë në detyrë edhe për të paktën një tjetër mandat 5-vjeçar. Kjo e bën atë liderin më të fuqishëm në Kinë që nga koha e presidentit Mao. Konfirmimi i mandatit të tretë erdhi në fund të kongresit të 20-të të Partisë Komuniste të Kinës.
Kjo është një ngjarje që ndodh një herë në 5 vite me qëllimin e përzgjedhjes së liderëve që do të ulen në karriget kryesore drejtuese për vitet e ardhshme.
Kufiri për dy mandate për presidentët kinezë u vendos në fillim të viteve 1980, pas vdekjes së Maos. Sundimi gati 30-vjeçar i këtij të fundit solli një kaos të madh, dhunë dhe paqëndrueshmëri në Kinë.
Kjo situatë solli nevojën e kalimit në një model të udhëheqjes kolektive që pushteti të mos ishte kaq i centralizuar në duart e një personi të vetëm. Por në vitin 2018, Presidenti Xi hoqi me sukses kufirin me dy mandate nga kushtetuta, duke hapur rrugën për konsolidimin e pushtetit të tij.
Nën udhëheqjen e tij Kina është bërë gjithnjë e më e pasur dhe e fortë. Por në dhjetë vitet e tij në pushtet, Presidenti Xi ka centralizuar gjithashtu një pjesë të madhe të pushtetit brenda shtetit dhe partisë nën kontrollin e tij.
Discussion about this post