Një ngjarje tronditëse është shënuar në Itali ku një shqiptar ka gjetur vdekjen teksa kishte shkuar për të vjedhur.
Mediat në vendin fqinj shkruajnë se është qëlluar për vdekje 38-vjeçari shqiptar Arbër Xheleshi.
Ngjarja e rëndë ndodhi tre ditë më parë, ku Xheleshi, baba i një fëmijë hyri në një banesë për të vjedhur në Frosinone por u qëllua me “shotgun” nga pronari duke mbetur i plagosur.
Ai u dërgua në spital menjëherë, por ka ndërruar jetë aty duke mos mundur t’u shpëtojë plagëve të marra. 38-vjeçari u identifikua tre ditë pas ngjarjes së rëndë.
Sipas mediave italiane ai është njohur nga disa familjarë, që jetonin gjithashtu në Itali. Edhe pse ekspertiza mjekoligjore nuk është bërë ende publike, dhe dinamika e ngjarjes ende nuk është zbardhur plotësisht, mediat italiane raportojnë se në momentin që pronari i shtëpisë ka qëlluar me çifte, Xheleshi ishte kthyer në drejtim të tij – edhe pse po largohej me vrap – me dorën e ngritur dhe me një pistoletë në duar. Në këtë moment, pronari ka qëlluar duke e menduar se do të qëllonte ai i pari.
Një tjetër rast i ngjashëm është raportuar këtë të premte nga mediat italiane, ku në periferi të Napolit, një burrë, pronari i një vile, ka vrarë me pistoletë dy italianë, 26 dhe 27-vjeçarë. Sipas mediave italiane, dy të rinjtë kishin ndaluar me makinë para shtëpisë e duke iu frikësuar një grabitjeje të mundshme, pronari ka qëlluar me armë në drejtim të tyre, duke i lënë të vdekur në vend.
