Pas muajsh qëndrimi pas hekurave, ish-deputeti i Partisë Demokratike, Ervin Salianji, është liruar me kusht nga burgu i Fierit. Vendimi i shumëpritur u mor sot nga Gjykata e Fierit, duke pranuar kërkesën e Salianjit pasi ai kishte ezauruar dy të tretat e dënimit të tij.
Gjyqtari Noel Vezizi ishte ai që shpalli vendimin, i cili u bazua në raportin pozitiv të dorëzuar nga Shërbimi i Provës gjatë seancës së sotme. Po ashtu, edhe prokurori Genci Mane shprehu dakordësinë e tij me kërkesën e ish-deputetit. Kjo vjen pas raportit pozitiv të vlerësimit të sjelljes nga Institucioni i Ekzekutimit të Vendimeve Penale (IEVP) në Fier, i cili u paraqit në seancën e kaluar dhe u cilësua si thelbësor nga avokati i Salianjit, Ledio Braho.
Pas daljes nga ambientet e Gjykatës së Fierit, Ervin Salianji, i shoqëruar nga forcat e Policisë, dha një deklaratë të shkurtër për gazetarët, duke njoftuar se do të mbajë një konferencë të posaçme për mediat në orën 17:00, me shumë mundësi nga selia e Partisë Demokratike në Tiranë.
“Gjykata e Fierit pas rekomandimeve pozitive të IEVP Fier dhe Shërbimit të provës dhe qëndrimit pozitiv të Prokurorit në lidhje me kërkesën e depozituar nga Salianji, pranoi kërkesën dhe vendosi lirimin e tij të parakohshëm me kusht”, – deklaroi avokati Ledio Braho.
Pamjet e mëngjesit të sotëm e treguan Ervin Salianjin me pranga në duar teksa dilte nga furgoni i Policisë për t’u futur në gjykatë, i shoqëruar nga një numër i madh efektivësh policie, një skenë që u kritikua si e pajustifikueshme për një person i konsiderojnë gjegjësisht si i të dënuar padrejtësisht.
Ervin Salianji ishte dënuar me 1 vit burgim pasi Gjykata e Apelit la në fuqi vendimin e Shkallës së Parë, për shkak të denoncimit të tij ndaj Geron Xhafajt, vëllait të ish-ministrit të Brendshëm Fatmir Xhafaj, për përfshirje në trafik droge. Vendimi u la në fuqi edhe nga Gjykata e Lartë, pavarësisht pohimeve të Salianjit dhe Partisë Demokratike se dënimi ishte një hakmarrje politike e orkestruar nga Kryeministri Edi Rama dhe Fatmir Xhafaj. Salianji, i cili kreu mbi 10 muaj burgim, ka edhe një dënim plotësues prej 5 vitesh heqje të së drejtës për të ushtruar funksione publike.
Vetë Ervin Salianji, pas lirimit, ka reaguar shkurtimisht duke konfirmuar konferencën e shtypit në orën 17:00. Lirimi i tij me kusht shihet si një fitore ndaj terrorit shtetëror, ndërsa pritet me interes mesazhi që ai do të përcjellë në konferencën e tij të parë pas daljes nga burgu.
Lexo edhe:
Discussion about this post