Ambasadorja Amerikane, Yuri Kim,ka takuar ditën e sotme ministren e re të Financave në vendin tonë Delina Ibrahimaj, ku i kujton asaj faktin që ne renditemi në zonën gri të Moneyval për pastrimin e parave. Lajmin e ka bërë të ditur vetë Yuri përmes një postimi në Twitter, ku tregon se i ka kërkuar Ibrahimajt që të shtojnë masat kundër pastrimit të parave.
Kim thotë se, qeveria duhet të ndërmarrë reforma më transparente për sistemin e taksave në vend dhe të vërë para përgjegjësisë ata që tentojnë korrupsionin.
“U takova dje me ministren e re të Financave dhe Ekonomise DelinaIbrahimaj për ta uruar atë për emërimin. SHBA nxit Shqipërinë të forcojë masat kundër pastrimit të parave, siç rekomandohet http://fatf-gafi.org/media/fatf/documents/reports/fur/Moneyval-FUR-Albania-2021.pdf-, që është thelbësore për luftën kundër korrupsionit.
SHBA mbështet fiskalizimin dhe dixhitalizimin e procedurave për të përmirësuar taksimin, transparencën dhe llogaridhënien. Rregulla të qarta, procese efikase dhe gjykata të pastra do të tërheqin investimet amerikane, dhe do të mbrojnë Shqipërinë nga aktorët e këqij. Kjo është lidhja midis demokracisë, mbrojtjes dhe biznesit”, shkruan Kim.
Në raportin më të fundit të publikuar nga Moneyval, vendi ynë renditet në listën gri çka do të thotë se kemi rrezikshmëri të lartë të pastrimit të parave dhe jemi nën vëzhgim të ndërkombëtarëve. Vazhdimisht, SHBA ka kërkuar rritjen e transparencës në sistemin e taksave dhe përmirësimin e konkurrencës si dy rrugë që luftojnë kundër korrupsionit dhe ndihmojnë vendin për integrimin në BE.
