Policia e Durrësit ka zbardhur tentativën për vrasje të ndodhur mëngjesin e sotëm në ambientet e dhomës së një hoteli, ku mbeti i plagosur një i ri.
Uniformat blu bëjnë me dije se në ambientet e dhomës së një hoteli, në të cilën kanë qenë M. B., T. Sh., A. B. dhe A. S., personi me iniciale M. B. ka tentuar të vrasë me armë zjarri, 20-vjeçarin, banues në Durrës, i cili ndodhet në spital, jashtë rrezikut për jetën.
Në vijim të veprimeve hetimore 26-vjeçari M. B., banues në Durrës, është shpallur në kërkim për veprat penale “Vrasja me dashje” mbetur në tentativë dhe “Armëmbajtja pa leje”. Në kërkim është shpallur edhe T. Sh., 32 vjeç, për veprën penale “Moskallëzim krimi”.
Gjithashtu është arrestuar në flagrancë një 22-vjeçare, për veprat penale “Armëmbajtja pa leje”, “Veprime që pengojnë zbulimin e së vërtetës” dhe “Moskallëzim krimi”. E reja, menjëherë pas ngjarjes, ka marrë armën e zjarrit dhe e ka fshehur në pjesën e pasme të hotelit;
Në pranga është vënë dhe E. H., 66 vjeç, për veprën penale “Moskallëzimi i krimit”, pasi ka strehuar shtetasen A. B., ndërkohë që ka pasur dijeni për ngjarjen.
Në cilësinë e provës materiale u sekuestrua arma e zjarrit pistoletë që është përdorur në këtë ngjarje. Ndërkohë, policia njofton se po vijon puna për kapjen e autorit.
Discussion about this post