I riu u arratis nga gjykata, vihen nën hetim 4 efektivët në Korçë

Katër efektive të Korçës janë vënë nën hetim pasi dyshohet se kanë shpërdoruar detyrën pas ngjarjes së djeshme ku 21-vjeçari Kristian Medolli i iku nga duart policëve teksa po e transportonin në gjykatën e Rrethit Gjyqësor Korçë.

Medolli, i akuzuar për vjedhjen e një banese, ishte me duar të prangosura dhe zbathur kur iu arratis policëve. Ai qëndroi për arrati rreth 2 orë dhe u kap pranë kodrave të qytetit të Korçës. Në lidhje me këtë ngjare Agjencia e Mbikëqyrjes Policore, ka vënë në hetim 4 punonjës të Komisariatit të Policisë së Korçës

Sipas njoftimit, i riu ka qenë duke hipur në mjetin e policisë, brenda ambienteve të garazhit të Gjykatës, ku u është larguar dy punonjësve të policisë dhe është kapur pak më pas nga shërbimet e Komisariatit të Policisë Korçë.