Prokuroria e Posaçme kundër Korrupsionit dhe Krimit të organizuar ka thelluar hetimet për skandalin e inceneratorit të Fierit, që çoi në pranga ish ministrin Lefter Koka dhe ish deputetin socialist Alqi Bllako.
Në dosjen hetimore që Fax news disponon në procedurat e tokës për ndërtimin e inceneratorit, del edhe emri i kryetarit të Bashkisë Fier, Armando Dubashi, i cili është akuzuar vazhdimisht nga opozita se është gjithashtu i përfshirë në skandal dhe është emri më potencial për të përfunduar në pranga. Në dosje thuhet se bashkisë së Fierit i është shkaktuar një dëm prej rreth 16 milion lekësh të rinj.
Hetimet e SPAK, kanë zbardhur faktin se Subashi ka firmosur 4 urdhra pagese edhe pse ishte në dijeni se vendimi i shpronësimit ishte marrë në qeveri në mënyrë të gabuar duke e paraqitur pronën si tokë truall kur në hipotekë rezultonte tokë arë.
Referuar dosjes Komisioni i Shpronësimit është ngritur me urdhër të Ministrisë së Mjedisit, por anëtarët e tij jo vetëm që nuk kanë marrë pjesë por as nuk kanë pasur dijeni. Anëtarët e Komisionit Ylli Hoxha, Ardiana Gjini, Rael Qeleshi, dhe Sabina Cenoimeri nuk qenë në dijeni dhe procedura është mbajtur vetëm nga kryetari Pëllumb Abeshi, cili aktualisht është vënë në pranga.
Prokurori i çështjes pritet të marrë në pyetje te gjithë të arrestuarit, përfshirë edhe Bllakon. Këtë herë, Bllako do pyetet nga SPAK si person nën hetim, ndryshe nga dy muaj më parë kur u pyet si person që kishte dijeni për dhënien e koncesionit e inceneratorit të Fierit.
Burime bëjnë me dije se grupi hetimor po këmbëngul që të bëjë bashkëpunëtorë një nga personat e arrestuar pak ditë më parë, lidhur me aferën e inceneratorit të Fierit, por nuk dihet nëse personi në fjalë do të jetë Alqi Bllako.
Discussion about this post