Administratori i Deleguar i Interit Beppe Marotta ishte shumë i qartë, objektivi i klubit lombard është kualifikimi në UEFA Champions League me çdo kusht, çdo përfundim tjetër do të kishte pasoja, për Simone Inzaghin të parin.
Në këtë pikë të sezonit, “Gli Nerazzuri” duhet të gjejnë vazhdimësi, mjaft me ulje ngritje, është shumë thelbësore që të blindojnë vendin e dytë në kampionat. Pavarësisht se trajneri Inzaghi ka sjell trofe, e fundit Superkupa Italiane përballë Milanit, kaq nuk mjafton në sytë e stafit drejtues për ta mbajtur në skuadër për të tretin vit radhazi.
Paraqitje si ajo kundër Bolognas, një humbje që la një shije shumë të hidhur, nuk tolerohen më. Në 2023, Inter ka lënë 10 pikë shumë të rëndësishme kundër rivalëve jo direkt, një detaj që nuk i ka pëlqyer aspak Beppe Marottas. Të dorëzuar për çështjen titull, pasi Napoli është shkëputur me 18 pikë, Interit nuk i mbetet gjë tjetër vetëm të mbaj larg Milan, Roma e Atalanta, vendi i dytë është një garanci për “Simonen” të parin.
Sigurisht që Marotta është i vetëdijshëm se nuk është momenti për të ushtuar më shumë presion, për këtë arsye nuk i kurseu elozhet në drejtim të Inzaghit duke theksuar se trajneri ka të gjithë besimin e stafit drejtues, por diskutimi për të ardhmen do të bëhet vetëm në fund të këtij sezoni.
Balkanweb
Discussion about this post