Interi i Milanos është i fokusuar kryesisht në përgatitet për ndeshjen e rëndësishme të javës së ardhshme në Champions League përballë Benficës së Lisbonës por deri atëherë i duhet të përqendrohet në Serie A në sfidën që e vendos përballë skuadrës së Salernitanës.
Ekipi lombard vjen në këtë sfidë pas barazimit të çmendur përballë Juventusit, një sfidë që u karakterizua nga tensioni gjatë dhe pas përfundimit të takimit të vlefshëm për gjysmëfinalet e Coppa Italia.
Simone Inzaghi duhet patjetër të marrë rezultat pozitiv, duke parë që në kampionat, fitorja dhe barazimet mungojnë prej tre takimesh. Ecuria negative ka bërë që zikaltërit të zbresin në pozitën e katërt në kampionat, me drejtuesit që nuk kanë mbetur të lumtur nga kjo gjë.
Ndaj Salernitanës, pra, nuk lejohen hapa false dhe Interi për këtë arsye do të zbresë në fushë me më të mirët.
Në 3-5-2 e teknikut Inzaghi, siç dihet, nuk ka vend për Kristjan Asllanin, të cilit trajneri i ka “vënë vizën” pa asnjë dyshim.
Në portë rikthehet Onana, pas pushimit që bëri në mesjavë në Torino, treshja e mbrojtjes do të jetë Darmian, Acerbi dhe Bastoni.
Në krahë do të jenë, Dumfries dhe Dimarco. Barella, Brozoviç dhe Mkhitaryan do të rreshtohen në qendër të mesfushës. Në sulm, Inzaghi do t’i besojë, me shumë gjasa, dyshes Lukaku-Lautaro Martinez.
Takimi do të nisë në orën 17:00 të ditës së premte.
Discussion about this post