Intervistë për “Vogue”, Dua Lipa tregon shprehjen shqip që e përdor me familjen

Nëse është dikush që vazhdon të na bëjë krenarë nëpër botë dhe s’resht kurrë së arrituri gjëra të mëdha, ajo është Dua Lipa.

Së fundmi, Dua ka qenë pjesë e intervistës së famshme të “Vogue”, konkretisht në rubrikën “73 pyetje me Dua Lipën”.

Ylli shqiptar ka bërë një mori deklaratash gjatë pyetjeve, ku ka folur për familjen e saj, jetën personale dhe atë profesionale. Ndër të tjera, Dua Lipa ka thënë se është “single”.

Por jo vetëm kaq, pasi Lipa nuk është kursyer aspak që të tregojë edhe shprehjen më të përdorur shqip në shtëpinë e saj.

“Çka ka me ngrënë”, është shprehur shqip këngëtarja e hitit “Levitating”. Jo vetëm kaq, por ajo tha se nëna e saj është një kuzhiniere shumë e mirë. Madje, përgatit shumë ushqime tradicionale shqiptare.

Nga ana tjetër, ajo ka rrëfyer se këngën e saj të parë e ka shkruar rreth moshës 4 ose 5 vjeçe për nënën e saj në gjuhën shqipe.

Dua asnjëherë nuk e ka mohuar origjinën e saj, përkundrazi, në shumë intervista ajo ka folur edhe shqip.