Ish ndihmësja e Hillary Clinton, Huma Abedin ka pohuar se është sulmuar seksualisht nga një senator amerikan ende i paidentifikuar.
Ndihmësja e Hillary Clinton për një kohë të gjatë dhe gruaja e ish-kongresmenit, Anthony Weiner, shkroi në librin e saj të ri “Both/And: A Life in Many Worlds”, se ajo ishte në gjendje ta hiqte nga mendja incidentin për vite me radhë.
Vetëm kur Christine Blasey Ford po dëshmonte për sulmin e saj të supozuar nga gjyqtari i Gjykatës së Lartë, Brett Kavanaugh në 2018, kujtesa u rishfaq.
Abedin shkroi për një darkë në Uashington, diku pas martesës së Donald Trump me Melania në 2005, përpara se ajo të ishte me Weiner. Ajo dhe Weiner u martuan në korrik 2010.
Abedin shkroi se ajo mori pjesë në darkë pa Clinton, me ‘disa senatorë dhe ndihmësit e tyre’, sipas një kopje të librit të siguruar nga The Guardian.
Huma Abedin tha se politikani i paidentifikuar e sulmoi atë në një divan në mesin e viteve 2000, pasi e ftoi në shtëpinë e tij. Ajo thotë se e kundërshtoi atë, por ai e puthi pa dëshirën e saj. Pretendimi është detajuar në librin e saj të ri, i cili do të botohet javën e ardhshme.
Sipas Guardian, Abedin shkruan në librin e saj: “Më pas, në një çast, gjithçka ndryshoi. Ai u hodh në të djathtën time, më vuri krahun rreth supit dhe më puthi. Isha shumë e tronditur, saqë e largova. Gjithçka që doja ishte që 10 sekondat e fundit të fshiheshin”.
Ajo refuzoi të identifikonte senatorin apo partinë politike që i përket.
