Humbja drastike ndaj rivalëve të përjetshëm, Liverpoolit ka lënë me pasoja drejtuesit e Manchester United. Trajneri Solskjaer në konferencën e zakonshme për shtyp një ditë para ndeshjes me Tottenhamin është ndalur tek disfata ndaj “The redsave” fundjavën e kaluar në “Old Trafford”.
“Paraqitja nuk ishte e pranueshme. Duhet të shohim njëri-tjetrin në sy dhe të pyesim veten se pse ndodhi kjo. Për të dhënë më mirë idenë e si u ndjemë, mund të them se ishim si një boksier i dehur, përfunduam në tapet pas 4 minutave të parë. Pas golit të parë që pësuam deshëm të reagonim por u hapëm shumë dhe ishim të ngutshëm përballë një skuadre të mirë. Duhet të përmirësohemi mendërisht.
Detyra ime është të bëj lojtarët gati në gjendjen më të mirë shpirtërore të mundshme. Jam unë përgjegjësi për rezultatin dhe për paraqitjen. Tani duhet të reagojmë. Kam kaluar momente të vështira si lojtar e tani edhe si trajner është e njëjta gjë. Më është dashur të bashkëjetoj me ndalesa, me 2-3 kriza, që kur kam filluar të drejtoj këtu. Por ajo që mund të them është vetëm se do të reagoj”, theksoi Solskjaer.
